СТОКГОЛЬМ. /Reuters/. Гренландия тұрғындарының 85% Дания құрамындағы автономиялы аймақты АҚШ-қа қосуды қаламайтынын сейсенбі күні өткізілген сауалнама нәтижелері көрсетті. Бұл туралы Данияның күнделікті "Berlingske" газеті хабарлады.
АҚШ президенті Дональд Трамп осы айдың басында Гренландияның АҚШ қауіпсіздігі үшін маңызды екенін атап өтіп, Дания осы стратегиялық маңызды аралдан бас тартуы керек деген болатын.
Алайда, Дания газетінің тапсырысы бойынша "Verian" фирмасы жүргізген сауалнама нәтижелеріне қарағанда, Гренландия тұрғындарының тек 6% ғана АҚШ-тың бір бөлігі болуды қолдайды, ал қалған 9% шешім қабылдамаған. Дүйсенбі күні Дания Арктикадағы әскери қатынасын күшейту үшін 14,6 миллиард крона (2,04 миллиард доллар) бөлетінін мәлімдеді.
Мексикадан үлкен жер аумағына ие және 57 мың тұрғыны бар Гренландияға 2009 жылы автономиялық статус берілді, бұл референдум арқылы Даниядан тәуелсіздік жариялау құқығын да қамтиды.
Тәуелсіздік үшін күрес жүргізіп келе жатқан Гренландияның Премьер-министрі Муте Эгеде "аралды сатпаймыз, болашақты халық шешеді" деп бірнеше рет айтқан болатын. АҚШ әскери күштері Гренландияның солтүстік-батыс бөлігіндегі Питуффик ғарыш базасында үнемі орналасқан. Бұл арал Еуропадан Солтүстік Америкаға дейінгі ең қысқа жолда орналасқан және баллистикалық ракеталарға қарсы ескерту жүйесінің стратегиялық маңызды орны болып табылады.