Munarmedia.kz 18.02.2026 / Көкшетау
Қаржылық қиындық пен қарыздың қамыты 27 жастағы түркістандық азаматты адам шошырлық қадамға баруға мәжбүр етті. Ол өз бүйрегін сатуға әрекет жасаған. Алайда табыс табудың орнына сотты болды.
Жоспарын жүзеге асыру үшін азамат алдымен осындай хабарландыру жариялайтын алаң іздеген. Ақыры мессенджердегі арналардың бірінен адам ағзаларын заңсыз саудалауға қатысты ұсыныстарды тауып, сол жерге хабарласқан.
Өзінің бір бүйрегін 13 миллион теңгеге бағалаған. Көп ұзамай «сатып алушы» да табылған.
Алғашқы кездесуде болжамды реципиент медициналық тексерістен өтуге 100 мың теңге берген. Кейін бүйрек үшін алғашқы транш – 5 миллион теңге Түркістан қаласындағы жеке медициналық орталықтардың бірінде тапсырылған. Алайда бұл ақша соңғысы болды: күдікті дәл сол сәтте ұсталды.
Белгілі болғандай, «сатып алушы» рөлінде полиция қызметкері әрекет еткен.
Қазақстанда адам ағзаларын заңсыз сату – ауыр қылмыс. Мұндай әрекеттер үшін қылмыстық жауапкершілік қарастырылған. Іс Түркістан облысының қылмыстық істер жөніндегі мамандандырылған ауданаралық сотында қаралды.
Айыпталушы кінәсін толық мойындап, сотта өкінетінін айтып, қаржылық қиындық пен қарызға батқанын алға тартқан.
Сот оны кінәлі деп таныды. Алайда рақымшылық актісі қолданылып, сотталушы сот залынан қамаудан босатылды. Үкім әзірге заңды күшіне енген жоқ.
Мамандардың айтуынша, соңғы жылдары әлеуметтік желілер мен мессенджерлерде адам ағзаларын заңсыз сату туралы жасырын ұсыныстар көбейген. Алайда Қазақстанда трансплантация тек арнайы лицензиясы бар медициналық ұйымдарда және қатаң заң талаптарына сәйкес жүргізіледі. Түркістандағы бірде-бір медициналық мекеме ресми түрде адам ағзасын трансплантациялау операцияларын жасамайды.
Қаржылық тығырыққа тірелген азаматтардың осындай қадамға баруы – әлеуметтік мәселенің көрінісі. Дегенмен заңсыз жолмен мәселе шешу – жағдайды одан әрі ушықтырып, қылмыстық жауапкершілікке әкеледі.
Құқық қорғау органдары азаматтарды күмәнді ұсыныстарға алданбауға шақырады.
Munarmedia.kz оқиғаның алдағы құқықтық дамуын бақылауда ұстайды.