Munarmedia.kz. 15.07.2026. ASTANA – Қазақстан билігі Қашаған кен орнын игеретін North Caspian Operating Company (NCOC) консорциумынан 2,3 трлн теңге көлеміндегі экологиялық айыппұлды 2026 жылғы 20 шілдеге дейін төлеуді талап етті.
Бұл туралы 14 шілдеде Қазақстан Республикасы Әділет вице-министрі Даниель Ваисов мәлімдеді.
Оның айтуынша, егер көрсетілген мерзімге дейін шетелдік компаниялар айыппұл сомасын төлемесе, Қазақстан заңнамасына сәйкес мәжбүрлеп өндіріп алу шаралары қолданылады.
Сонымен қатар, вице-министр NCOC құрамындағы мердігер компаниялардың қазақстандық мемлекеттік органдардың шешімімен келіспейтінін және осыған байланысты дауды шешу үшін Инвестициялық дауларды реттеу жөніндегі халықаралық орталыққа (ICSID) жүгінгенін айтты. Қазіргі уақытта іс АҚШ-тың Вашингтон қаласында қаралып жатыр.
NCOC консорциумының құрамына:
«ҚазМұнайГаз» – 16,8%;
Shell – 16,8%;
TotalEnergies EP Kazakhstan – 16,8%;
Agip Caspian Sea B.V. – 16,8%;
ExxonMobil Kazakhstan Inc. – 16,8%;
CNPC Kazakhstan B.V. – 8,3%;
Inpex North Caspian Sea Ltd. – 7,5% кіреді.
Айта кетейік, Қашаған – Қазақстандағы және әлемдегі ең ірі мұнай кен орындарының бірі саналады. Соңғы жылдары жобаға қатысты экологиялық талаптардың сақталуы мен өндірістік қызметке байланысты бірнеше құқықтық және қаржылық дау туындаған.
#Munarmedia #ASTANA #Қазақстан #Қашаған #NCOC #Экология #ҚазМұнайГаз #МұнайГаз #ICSID #Экономика