Munarmedia.kz 06.11.2026 /ASTANA/-Шоқан Уәлиханов атындағы жекеменшік
мектептің 10-сынып оқушысы Алан Баймұхан әскери қызметке қабылдау үдерісін
жеңілдетуге бағытталған Jauynger цифрлық платформасын әзірледі. Жас әзірлеуші
жетекшілік ететін команда жасаған жоба
AI & Digital
Bridge Kazakhstan халықаралық форумында «Жылдың үздік мемлекеттік жобалары»
номинациясы бойынша үшінші орын иеленді.
Jauynger платформасы азаматтарға әскери қызметке өтініш
беруден бастап келісімшартқа қол қоюға дейінгі негізгі кезеңдерден онлайн өтуге
мүмкіндік береді. Жүйеде құжаттарды рәсімдеу, электрондық қолтаңбаны пайдалану,
өтініш мәртебесін бақылау және жасанды интеллект негізіндегі навигатор
қызметтері қарастырылған.
Алан Баймұхан мен оның командасы платформаны толық әзірлеп, App
Store дүкенінде жариялады.
Жоба деректері Қазақстан аумағындағы серверлерде сақталады.
AI & Digital Bridge Kazakhstan форумынан кейін жас
әзірлеуші командасы Қазақстан Республикасы Қорғаныс министрлігі өкілдерімен Jauynger
платформасын енгізу және одан әрі дамыту мүмкіндіктерін талқылады.
Алан — үш технологиялық жобаның авторы әрі құрамында
мектеп оқушылары бар әзірлеушілер командасының жетекшісі. Оның Takhet+ медициналық
платформасы пациенттерді, дәрігерлер
мен клиникаларды бір жүйеге біріктіреді. Ал Simplify жобасы
жасанды интеллект арқылы шетелдік компанияларға жұмысқа орналасу үдерісін
автоматтандырады.
Аланның кәсіпкерлік жолы 2025 жылы SHOQAN
SCHOOL ұйымдастырған Shoqan Startup байқауынан басталды. Ол Takhet+ жобасымен үшінші
орын алып, 1 миллион
теңге көлемінде жүлдеге ие болды.
Shoqan Startup бағдарламасы
мектеп құрылтайшылары — қазақстандық кәсіпкер Кеңес Рақышев пен эколог Әсел
Тасмағамбетованың бастамасымен құрылған.
Бағдарлама оқушылардың кәсіпкерлік қабілетін дамытуға, технологиялық идеяларын
нақты өнімге айналдыруға және өз жобаларын тәжірибеде сынап көруіне мүмкіндік
береді.
Аланның әскери салаға және елдің қорғаныс жүйесін дамытуға
қатысты технологияларға қызығушылығы — оның азаматтық жауапкершілігінің бір
көрінісі. Жас әзірлеуші өз білімін ел игілігіне жаратып, отандық цифрлық
шешімдердің дамуына үлес қосуды мақсат етеді. Бұл ұстанымның қалыптасуына мектептегі білім мен тәрбие
ортасының да ықпалы зор.