30.05.2026. АСТАНА. Munarmedia.kz – Алдағы жылдары Еуразиялық экономикалық одаққа (ЕАЭО) мүше мемлекеттерде технологиялық және цифрлық салалардағы мамандарға сұраныс арта түседі. Бұл туралы Бүкілресейлік сыртқы сауда академиясының ректоры Виктория Идрисова мәлімдеді.
Сарапшының айтуынша, еңбек нарығына жүргізілген зерттеулер нәтижесі бойынша бірнеше бағыттағы кадрларға қажеттілік жоғары болмақ.
Ең алдымен, өндірістік және технологиялық салаларда еңбек ететін жұмысшы мамандық иелері, соның ішінде инженерлер ерекше сұранысқа ие болады. Қазіргі таңда ЕАЭО елдерінде мұндай білікті кадрлардың тапшылығы байқалып отыр.
Сондай-ақ ақпараттық технологиялар саласындағы мамандарға деген қажеттілік алдағы жылдары да арта береді. Цифрландыру үдерісінің жеделдеуі бағдарламашыларға, жүйелік инженерлерге, киберқауіпсіздік және жасанды интеллект саласының мамандарына сұранысты күшейтпек.
Бұдан бөлек, бірнеше саланы қатар меңгерген жоғары білікті мамандардың маңызы артады. Мәселен, сыртқы экономикалық қызмет саласында халықаралық құқықты, әлемдік экономиканы, логистиканы және менеджментті қатар игерген кәсіби кадрлар ерекше бағаланатын болады.
Сарапшылардың пікірінше, болашақ еңбек нарығында тек тар мамандану жеткіліксіз болуы мүмкін. Сондықтан жастар мен жұмыс іздеушілерге цифрлық дағдыларды жетілдіріп, бірнеше бағыт бойынша білім мен тәжірибе жинақтау маңызды.
#ЕАЭО #ЕңбекНарығы #Мамандық #Инженер #IT #АқпараттықТехнология #Білім #Жұмыс #Экономика #Munarmedia