Munarmedia.kz 05.06.2026. ASTANA – Тіркелмеген «Атажұрт» ұйымының сотталған белсенділерінің туыстары АҚШ елшілігі өкілдерімен кездесуге бара жатқан жолда пойыздан түсіріліп, полиция қызметкерлері тарапынан ұсталғанын мәлімдеді.
Бұл туралы олар Қазақстан халықаралық адам құқықтары және заңдылықты сақтау бюросында өткен баспасөз мәслихатында айтты.
Сотталған «Атажұрт» ұйымының төрағасы Бекзат Мақсұтханның жұбайы Нұргүл Ибраеваның сөзінше, ол 23 наурыз күні Астанаға барып, АҚШ елшілігінің өкілдерімен кездесуді, сондай-ақ Бас прокуратура мен Президент әкімшілігіне өтініш жолдауды жоспарлаған.
«Пойызға мініп, орныма жайғасып үлгергенім сол еді, полиция қызметкерлері келіп, мені вагоннан түсірді. Себебін сұрағанымда, өздерінің де нақты білмейтінін айтты. Мені шамамен бір жарым сағат кезекші бөлімде ұстап отырды, кейін полиция департаментіне жеткізді. Ол жерде екі сағат бойы сұрақ қойды. "Неге бара жатырсыз? Өтініштеріңізді неге бізге жазбайсыз? Олар сізге не істей алады?" деген сауалдар қойылды», – деді Нұргүл Ибраева.
Баспасөз мәслихатына қатысушылардың айтуынша, осындай жағдайға өзге де туыстары тап болған. Олар бұл мәселеге қатысты құзырлы органдардан түсініктеме беруді сұрады.
Әзірге құқық қорғау органдары тарапынан аталған мәлімдемелерге қатысты ресми түсініктеме жарияланған жоқ.
#Атажұрт #Астана #АдамҚұқықтары #НұргүлИбраева #БекзатМақсұтхан #Қазақстан #Қоғам #MunarMedia #ASTANA #Жаңалықтар