Munarmedia.kz 04.01.2026 /Астана/ БҰҰ-ның Азық-түлік және ауыл шаруашылығы ұйымы (ФАО) әлемде жан басына шаққандағы жаңартылатын су ресурстарының қолжетімділігі төмендеуін жалғастырып отырғанын мәлімдеді. Соңғы он жылда бұл көрсеткіш тағы 7%-ға қысқарған, деп хабарлайды «Ховар» ақпарат агенттігі.
AQUASTAT деректер қорының жаңартылған шолуына сәйкес, Орталық Азия су ресурстарының қолжетімділігі ең көп азайған өңірлердің бірі болып отыр. Мұнда қолда бар су қорының 12%-ы жоғалған, бұл жағдайдың негізгі себептерінің бірі — су пайдаланудың салалық құрылымы. Атап айтқанда, өңірде су алудың 82%-ы ауыл шаруашылығының үлесіне тиесілі.
Су тапшылығын бағалау барысында сарапшылар «су стресі» көрсеткішін қолданады. Бұл индикатор алынатын су көлемінің қолда бар су қорына арақатынасын көрсетеді.
2022 жылы жаһандық деңгейдегі орташа су стресі 18%-ға жеткен. Алайда бірқатар өңірлерде бұл көрсеткіш аса қауіпті деңгейде қалып отыр. Атап айтқанда:
Солтүстік Африкада — 121%,
Оңтүстік Азияда — 76,7%,
Орталық Азияда — 70,2%,
Батыс Азияда — 65,1%.
Сарапшылардың пікірінше, су ресурстарының азаюы азық-түлік қауіпсіздігіне, экономикалық тұрақтылыққа және өңірлік дамуға тікелей әсер етеді. Осыған байланысты су ресурстарын басқару жүйесін жетілдіру және үнемді технологияларды енгізу стратегиялық маңызға ие болып отыр.