Париж, 2025 жылғы 16 ақпан /BBC/ – Еуропа көшбасшылары алдағы аптада Украина мәселесі бойынша шұғыл саммит өткізетін болды. Бұл шешім АҚШ-тың Ресеймен бейбіт келіссөздерге Еуропа елдерін қатыстырмайтыны белгілі болған кезде қабылданды.
Парижде өтетін саммитке қатысуы күтіліп отырған Ұлыбритания премьер-министрі Киир Стармер бұл жағдайды "ұлттық қауіпсіздік тұрғысынан аса маңызды сәт" деп атап, Еуропаның НАТО-да үлкен рөл атқаруы қажеттігін мәлімдеді.
АҚШ президенті Дональд Трамптың Украина мәселесі жөніндегі арнайы өкілі Кит Келлог "АҚШ пен Ресей арасындағы кез келген келіссөзге Еуропа елдері қатыспайды" деп мәлімдеген соң, бұл саммитті өткізу туралы шешім қабылданған.
Ақ үйдің жоғары лауазымды өкілдері алдағы күндері Сауд Арабиясында Ресей және Украина делегацияларымен кездесуді жоспарлап отырғанын АҚШ ресми тұлғалары хабарлады. Сенбі күні АҚШ мемлекеттік хатшысы Марко Рубио Ресей сыртқы істер министрі Сергей Лавровпен телефон арқылы сөйлесіп, екіжақты саммитке дайындық аясында тұрақты байланыста болуға уағдаласты.
Дональд Трамп пен Владимир Путин 12 ақпанда телефон арқылы сөйлескен. Бұл – соңғы үш жылда Вашингтон мен Мәскеу арасында өткен алғашқы жоғары деңгейдегі диалог. АҚШ Өкілдер палатасының мүшесі Майкл Макколдың Reuters агенттігіне хабарлауынша, Трамп әкімшілігінің жоғары лауазымды өкілдері жақын күндері Сауд Арабиясында Ресей мен Украина делегацияларымен бейбіт келіссөздерді бастайды.