Munarmedia.kz 23.11.2025 / Астана/ Еуропалық одақ Дональд Трамп ұсынған Украина жөніндегі бейбіт жоспардың кемінде төрт тармағын өзгерту қажет деп санайды. Bild басылымының хабарлауынша, ең маңызды талаптардың бірі — территорияны бөлу туралы пунктті құжаттан түгел алып тастау. Әсіресе Донецк облысын және Қырымды Ресей құрамында тану жөніндегі ұсыныстар Еуропа тарапынан қабылданбайтыны ашық айтылған. Мәлімдемеде: «шекаралар күш қолдану арқылы өзгермеуі тиіс» деген принцип қатаң сақталуы керектігі ерекше атап өтіледі.
Сондай-ақ ЕО сарапшылары Украина армиясын 600 мың адамға дейін қысқарту идеясын қауіпті деп бағалап отыр. Олардың пікірінше, бұл елді жаңа қауіптер алдында әлсіретіп, тұрақсыздық тудыруы мүмкін.
Еуропалық тарап Ресейдің кез келген қауіпсіздік кепілдіктерінің сенімділігіне де күмән келтіреді. Bild жазғандай, ЕО-да бұрын жасалған кейбір келісімдердің бұзылғанын еске салып, жаңа құжатта Мәскеудің формалды уәделеріне сүйену — жоғары тәуекел екенін алға тартады (қай келісімдер екені нақты көрсетілмеген).
Тағы бір даулы мәселе — Ресейдің мұздатылған активтерінің болашағы. Еуропа елдері Кремль бұл активтерден қандай да бір жанама пайда көруі мүмкін кез келген тетікке қарсы. Трамп жоспарының бастапқы нұсқасында активтердің бір бөлігі АҚШ бақылауымен Украинаны қалпына келтіруге жұмсалатыны, тағы бір бөлігі АҚШ пен Ресейдің бірлескен жобаларына салынатыны қарастырылған.
Еуропаның ұсыныстары Вашингтон ұсынған жоспардың айтарлықтай қайта қаралуы мүмкін екенін көрсетеді. Бұл өз кезегінде Украина мәселесі бойынша трансатлантикалық талқылаудың әлі де күрделі әрі көпжақты сипатқа ие екенін аңғартады.