Munarmedia.kz 23.11.2025 / Астана/ Қырғызстанда соңғы күндері саясаткерлер мен белсенділерге қатысты жүргізіліп жатқан тінту, тергеу және ұстау шаралары ел ішінде кең резонанс тудырды. Тергеу эпизодтарының басым бөлігі ҚК-нің 278-бабы — жаппай тәртіпсіздіктерді ұйымдастыру дерегі бойынша қаралуда. Тексеріліп жатқан тұлғалардың көптігі, олардың туыстарының да тергеу процесіне тартылуы қоғамда қызу талқыға себеп болды.
Кеше Қырғызстан ІІМ саясаткер Темірлан Сұлтанбековке қатысты әрекеттер туралы хабарлады. Ол билікті күштеп өзгертуге шақырды деген күдікке ілініп, үйін тінту барысында ұсталып, кейін жауап алуға жеткізілген. Осы іс аясында бұрынғы президенттің ұлы Қадырбек Атамбаев та қамауға алынды. Сондай-ақ тергеу амалдарына экс-бірінші ханым Раиса Атамбаева қатысқан, кейін ол босатылған.
Тінту шаралары бұрынғы депутат Шайлообек Атазов, экс-шенеунік Сыймык Жапыкеев, экс-депутат Кубанычбек Кадырөв және журналист Дмитрий Ложниковты да қамтыды. Соңғысы өзінің ешбір фигурантпен байланысы жоқ екенін айтып отыр.
Тергеу изоляторында Сұлтанбеков, Атамбаев және Атазовқа бұлтартпау шарасы таңдалуы күтілуде. Ұсталғандар қатарында бұрынғы президент Алмазбек Атамбаевтың экс-оққағары Дамир Мусакеев және «Социал-демократтар» партиясының өкілі Эрмек Эрматов бар.
ІІМ мәліметіне қарағанда, арнайы топ Жогорку Кенеш сайлауынан кейін тәртіпсіздік ұйымдастыруды жоспарлаған. Тінту барысында қару-жарақ, оқ-дәрі, гранаталар, 150 мың АҚШ доллары, сондай-ақ тергеу органдары «қаржыландыруға байланысты» деп сипаттаған құжаттар тәркіленген.
Бұл оқиғалар әлеуметтік желілердегі талқылауларды күшейтіп, қоғамдық көңіл күйді одан әрі шиеленістірді. Бастапқыда халықтың наразылығын электр энергиясын беру бойынша шектеулер туғызған болса, кейін талқылау саяси мәселелерге ұласып, жалпы қоғамдық көңіл-күйдің күрделене түскені байқалады.
Оқиғаға байланысты ресми мәлімдемелер жалғасуда, ал Қырғызстан қоғамы тергеудің барысын жіті бақылап отыр.