Munarmedia.kz 23.11.2025 / Астана/ «Глобалды терроризм индексі – 2025» есебі бойынша Қазақстан әлемдегі ең қауіпсіз мемлекеттердің бірі ретінде танылды. Еліміз 100-орынға ие болып, террористік қатер деңгейі нөл деп бағаланды. Бұл көрсеткіш АҚШ, Канада, Ұлыбритания, Франция, Германия сияқты дамыған елдерден, сондай-ақ Ресей, Қытай, Өзбекстан, Тәжікстан секілді көршілес мемлекеттерден жоғары.
Әлемдік жағдай, керісінше, күрделеніп келеді. Есепте айтылғандай, теракт орын алған елдердің саны артқан, ал Батыс мемлекеттерінде шабуылдар 63 пайызға көбейген. Бірқатар еуропалық елдерде бірнеше жыл тыныштықтан кейін алғашқы рет терактілер тіркелген. Германия биыл Магдебургтегі жәрмеңкеде болған қанды оқиғадан соң Еуропадағы ең нашар көрсеткіштердің бірін көрсеткен. Ең қауіпті ондыққа Израиль мен Сирия да кірді.
Салыстырмалы түрде алғанда, 2017 жылы Қазақстан индекс бойынша 67-орында тұрған еді. Ел аумағында соңғы терактілер 2016 жылы тіркелді. Сарапшылар бүгінгі жоғары қауіпсіздік деңгейін арнайы қызметтердің жүйелі жұмысы және ҮЕҰ-лардың алдын алу шараларымен байланыстырады. 2017 жылдан 2025 жылға дейін елімізде терроризмге қатысты 40-қа жуық қастандықтың алдын алу мүмкін болған, оның екеуі – биыл.
Қазақстанның тұрақтылығы мен қауіпсіздігі халықаралық қауымдастық тарапынан жоғары бағаланып отыр.