Munarmedia.kz 18.02.2026 /Астана/ Қазақстанда FlyArystan әуе компаниясының жолаушылардан қол жүгінің артық салмағы үшін ақы алу тәртібіне байланысты тексеру жүргізіліп жатыр. Бұл туралы Алматы қаласы бойынша Бәсекелестікті қорғау және дамыту агенттігі департаментінің басшысы Нұржан Нұрланұлы мәлімдеді.
Ресми мәліметке сәйкес, қазіргі қолданыстағы ережелер бойынша жолаушының қол жүгінің артық салмағы 1 килограмм болса да, 5 килограмм болса да, бірдей тариф төлеуі талап етіледі.
Мамандардың айтуынша, әлемдік тәжірибеде көптеген әуе тасымалдаушылары артық салмаққа нақты мөлшеріне қарай дифференциалды тариф қолданады. Яғни жолаушы тек нақты артық салмақ үшін ғана төлейді.
Нұржан Нұрланұлының айтуынша, бірдей тариф қолдану жолаушылардың құқықтарын шектеуі мүмкін және халықаралық тәжірибеге сәйкес келмейді.
Агенттік өкілдерінің хабарлауынша, әуе компанияның әрекеттерінде бәсекелестікті қорғау туралы заңнаманы бұзу белгілері бар деген алдын ала қорытынды жасалған. Осыған байланысты тасымалдаушыға тиісті ескертулер жолданған.
Алайда қойылған талаптардың толық орындалмағаны айтылып, қазіргі уақытта ресми тергеу жалғасып жатыр. Тексеру нәтижесіне қарай компанияға әкімшілік шаралар қолданылуы немесе тарифтік саясатты өзгерту туралы міндеттеме жүктелуі мүмкін.
Көлік саласының сарапшылары соңғы жылдары Қазақстанда лоукостерлердің үлесі артқанын атап өтеді. Мұндай компаниялар билет бағасын төмен ұстау үшін қосымша қызметтерді ақылы ету тәжірибесін кең қолданады. Соның ішінде багаж, орын таңдау, борттағы қызметтер сияқты шығындар жеке тарифпен есептеледі.
Дегенмен, мамандардың пікірінше, тариф саясаты ашық әрі түсінікті болуы керек, ал жолаушылар нақты қандай қызмет үшін қанша төлейтінін анық білуі тиіс.
Қазіргі уақытта тексеру нәтижелері жарияланған жоқ. Ресми органдар зерттеу аяқталғаннан кейін қосымша ақпарат берілетінін хабарлады.