Munarmedia.kz 23.07.2026. ASTANA – Израильдің бірқатар бұқаралық ақпарат құралдары Моңғолия аумағында израильдік туристер мен этникалық қазақтар арасында жанжал болғаны жөнінде ақпарат жариялады. Алайда бұл мәліметтерді Моңғолия билігі әзірге ресми түрде растаған жоқ.
Израильдік БАҚ-тың хабарлауынша, 14 шілдеде Моңғолияда автокөлікпен саяхаттап жүрген алты Израиль азаматы елдің батысындағы Баян-Өлгий аймағында түнеуге аялдаған кезде қарулы шабуылға тап болған.
Басылымдардың деректері бір-бірінен ерекшеленеді. Кейбірі шабуылды балта ұстаған мас күйдегі бір мұсылман қазақ жасады деп жазса, енді біреулері пышақ пен балтамен қаруланған бірнеше радикалды топ шабуыл жасағанын алға тартады. Сондай-ақ ақпараттарда туристердің арасында Израиль қорғаныс армиясының (ЦАХАЛ) бұрынғы әскери қызметшілері болғаны және олардың шабуылға қарсыласқаны айтылған.
Израильдің Jewish.ru порталының мәліметінше, жанжал салдарынан бір турист ауыр жарақат алып, жақ сүйегі сынғандықтан арнайы рейспен Израильге емделуге жеткізілген.
Сонымен қатар Израильдің «7-арнасы» туристердің бірінің «Бұл антисемиттік шабуыл екені анық болды» деген сөзін келтіреді.
Алайда жарияланған мәліметтерге қарағанда, оқиғаға қатысушылар жергілікті полицияға ресми арыз түсірмеген. Олар болған жағдай туралы тек Израильдің Қытайдағы елшілігіне хабарлаған.
Оқиғаға қатысты пікір білдірген «Туранарь» Telegram-арнасының авторлары Израиль БАҚ-тарындағы ақпараттың шынайылығына күмән келтіріп, мұндай хабарламалар Израиль билігінің жаһандық антисемитизм тақырыбындағы ақпараттық ұстанымымен үйлесетінін атап өткен.
Мақала жарияланған сәтке дейін Моңғолияның құқық қорғау органдары мен мемлекеттік органдары бұл оқиғаға қатысты ресми мәлімдеме жасаған жоқ. Ал жергілікті БАҚ Израиль ақпарат көздеріне сілтеме жасап, оқиға елдің солтүстігінде емес, этникалық қазақтар тығыз қоныстанған Баян-Өлгий аймағында болғанын хабарлаған.
Сондай-ақ Израильдің кейбір бұқаралық ақпарат құралдары Моңғолия билігі бұл оқиғаны айыптады деп жазғанымен, мұны растайтын ресми мәлімдеме әзірге жарияланған жоқ.
#Munarmedia #ASTANA #Моңғолия #Израиль #БаянӨлгий #Қазақтар #Туристер #Антисемитизм #ХалықаралықЖаңалықтар