Франция президенті Эммануэль Макрон Вашингтонның Украинаға берілген алыс қашықтықтағы зымырандарды Ресей аумағына қолдану туралы шешімін «абсолютті түрде дұрыс» деп атады.
France Info француз қоғамдық ақпараттық телеарнасының хабарлауынша, бұл мәлімдеме Макронның Бразилиядағы G20 саммиті аясында айтылған.
«Бұл өте дұрыс шешім болды, себебі Ресей мен Украина арасындағы қақтығысқа Солтүстік Корея әскерлерінің Ресей жағына қатысуы жағдайды едәуір өзгертіп жіберді», – деп мәлімдеді Франция президенті.
Макрон Ресейдің Украинадағы қақтығысты ушықтыруына кінәлі екенін ерекше атап өтті.
«Ресей Солтүстік Кореяны өз жағына тартып, жағдайды шиеленістіріп отыр. Солтүстік Корея агрессивті саясат жүргізетін және алыс қашықтыққа арналған ядролық зымыран бағдарламасы бар ел ретінде белгілі. Бұл соғыстағы маңызды бетбұрыс және АҚШ-тың шешіміне әсер еткен негізгі фактор болды», – деді ол.
Соңғы баспасөз конференциясында АҚШ Қорғаныс министрлігінің (Пентагон) баспасөз хатшысының орынбасары Сабрина Сингх Америка бұқаралық ақпарат құралдарындағы Вашингтонның Украинаға берілген алыс қашықтықтағы тактикалық зымыран кешендерін (ATACMS) Ресей аумағында қолдануға рұқсат берді деген мәліметтерді растамады.