АСТАНА.23.05.2026.Munarmedia.kz – 2026 жылдың І тоқсанының қорытындысы бойынша Қазақстан экспортындағы мұнайдың үлесі тарихи деңгейге дейін азайды. Бұл туралы елдің сыртқы сауда көрсеткіштеріне қатысты ресми деректерде айтылды.
Мәліметке сәйкес, биылғы қаңтар-наурыз айларында Қазақстанның сыртқы сауда айналымы 10,5 пайызға өсіп, 32,9 миллиард АҚШ долларына жеткен. Оның ішінде экспорт көлемі 9,4 пайызға артып, 18 миллиард долларды құрады.
Алайда экспорт құрылымында елеулі өзгерістер байқалған. Егер 2025 жылдың І тоқсанында шикі мұнай жалпы экспорттың 52 пайызын құраса, 2026 жылдың наурыз айының соңына қарай бұл көрсеткіш 44,4 пайызға дейін төмендеген.
Сарапшылардың мәліметінше, мұнай жеткізілімінің физикалық көлемі 9,6 пайызға артқанымен, экспорттан түскен кіріс жылдық есепте 6,6 пайызға азайған. Бұған әлемдік нарықтағы баға құбылуы мен өндірістік-логистикалық қиындықтар әсер еткен.
Атап айтқанда, Каспий құбыр консорциумы инфрақұрылымына жасалған шабуылдар, Теңіз кен орнындағы апат және өзге де техникалық іркілістер мұнай экспортына кері ықпалын тигізген.
Сонымен қатар бюджет кірісінің төмендеуіне жол бермеген негізгі факторлардың бірі – металл, уран, күкірт, бидай, күнбағыс майы мен мал азығы бағасының өсуі болды. Бұл өнімдер экспортының артуы Қазақстанның шикізаттық емес секторларындағы белсенділіктің күшейгенін көрсетеді.
Мамандардың пікірінше, экспорт құрылымындағы мұндай өзгеріс ел экономикасын әртараптандыру үдерісінің жанданып келе жатқанын аңғартады.
#Қазақстан #Экспорт #Мұнай #Экономика #Сауда #Теңіз #КТК #Munarmedia