Munarmedia.kz 26.02.2026 /Astana/Қазақстанда алтын өндіру саласын жаңа деңгейге көтеретін ауқымды жоба жүзеге асырылуда. Қазақстандық алтын өндіруші Solidcore Resources plc компаниясы Ертіс гидрометаллургиялық комбинатын салып жатыр. Жоба халықаралық қаржы институты — KfW IPEX-Bank қолдауымен іске асуда.
Компанияның баспасөз қызметі таратқан мәліметке сәйкес, бұл комбинат еліміздегі алғашқы ірі гидрометаллургиялық өңдеу кешендерінің бірі болмақ. Жоба іске қосылғаннан кейін кәсіпорын жылына 300 мың тоннаға дейін алтын құрамды концентрат өңдей алады.
Өндіріс нәтижесінде жылына 500 мың унцияға дейін доре құймасы өндірілмек. Доре — құрамында алтын мен басқа да металдар бар жартылай дайын өнім. Кейін ол тазарту кезеңінен өтіп, жоғары сынамалы таза алтынға айналады.
Сарапшылардың пікірінше, мұндай өндірістің іске қосылуы Қазақстанның алтын өңдеу саласындағы қосылған құн үлесін арттырып, экспорттық әлеуетін күшейтеді. Сонымен қатар жаңа жұмыс орындары ашылып, өңірлік экономиканың дамуына серпін береді.
Халықаралық қаржы институтының қатысуы жобаның инвестициялық тартымдылығын және оның экономикалық негізділігін көрсетеді. Бұл — Қазақстанның тау-кен металлургия секторына деген сыртқы сенімнің айғағы.
Ертіс гидрометаллургиялық комбинаты толық қуатында жұмыс істей бастаған кезде, еліміздің алтын өндіру және өңдеу инфрақұрылымы сапалық жаңа кезеңге өтеді деп күтілуде.