Астана. 07.05.2026. Munarmedia.kz –Сіздерді Отан қорғаушы күнімен шын жүректен құттықтаймын!
Бұл мереке – ерлік пен елдік рухтың, батылдық пен Отанға адал қызмет етудің айқын символы. Отан қорғаушы күні халқымыздың қаһармандық тарихын, тәуелсіз Қазақстанның қалыптасу жолындағы маңызды кезеңдерді және ұрпақтар сабақтастығын айшықтайтын ерекше дата.
Бұл күні біз ел тыныштығы мен мемлекеттің тұтастығын күзетіп тұрған әскери қызметшілерге, ардагерлерге және Отан қорғауды қасиетті парыз санайтын азаматтарға айрықша құрмет көрсетеміз.
Отанды қорғау – қай кезеңде де үлкен жауапкершілік пен мәртебелі міндет. Әскери антқа адалдық танытып, ел қауіпсіздігін қамтамасыз ету жолында аянбай еңбек етіп жүрген азаматтар қоғамның зор сеніміне ие.
Бүгінде аға буынның жауынгерлік дәстүрін жалғастырып келе жатқан Қазақстан Қарулы күштерінің әскери қызметшілері кәсібилігімен, тәртібімен және жауынгерлік даярлығымен ерекшеленіп отыр. Олар кез келген күрделі тапсырманы орындауға дайын екендерін күн сайын дәлелдеп келеді.
Мемлекет басшысы – Қарулы күштердің Жоғарғы Бас қолбасшысы Қасым-Жомарт Тоқаев жүргізіп отырған дәйекті саясаттың нәтижесінде еліміздің қорғаныс қабілеті нығайып, армия заманауи техникамен және қару-жарақпен қамтамасыз етілуде. Сонымен қатар жауынгерлік дайындық деңгейі жүйелі түрде артып келеді.
Қазақстандық әскери қызметшілер түрлі оқу-жаттығуларға, оның ішінде халықаралық деңгейдегі әскери маневрлерге белсенді қатысып, жоғары кәсіби шеберлік пен үйлесімділікті көрсетіп жүр.
Сондай-ақ Қарулы күштердің халықаралық қауіпсіздік пен тұрақтылықты қамтамасыз етуге қосып отырған үлесі де ерекше. Қазақстандық бітімгерлер халықаралық ұйымдар аясындағы миссияларды абыроймен атқарып, еліміздің бейбітшілік қағидаттарына берік екенін танытып келеді.
Мемлекет тарапынан әскери қызметшілерді әлеуметтік қолдау бағытында да кешенді жұмыстар жүзеге асырылып жатыр. Әскерилердің қызмет ету және тұрмыс жағдайларын жақсарту, әлеуметтік қорғалу деңгейін арттыру – армияның рухын күшейтудегі маңызды қадамдардың бірі.
Сарбаздар мен сержанттарға, офицерлер мен ардагерлерге ел алдындағы адал қызметі мен әскери антқа беріктігі үшін шынайы ризашылығымды білдіремін. Алдағы уақытта да сіздер жүктелген міндеттерді абыроймен атқарып, халық сенімін ақтай береді деп сенемін.
Баршаңызға зор денсаулық, бақ-береке, отбасыларыңызға амандық және еліміздің игілігі жолындағы еңбектеріңізге толағай табыс тілеймін!
Құрметпен, "Munarmedia" медиа-холдингінің президенті Баяжума Асылбек