АСТАНА.23.05.2026.Munarmedia.kz – Қытай билігі Еуропалық одақ тарапынан қытайлық компаниялар мен өнімдерге қарсы жаңа шектеулер енгізілген жағдайда «батыл жауап шараларын» қабылдауға дайын екенін мәлімдеді.
Бұл туралы Бейжіңде өткен брифингте Қытайдың Сауда министрлігі өкілі Хэ Ядун айтты.
Мәлімдеме Еурокомиссия өкілдері Қытайдағы «артық өндірістік қуат» мәселесіне қарсы жаңа сауда тетіктерін талқылауға ниетті деген ақпарат аясында жасалды.
Қытай тарапы Брюссельдің ұстанымын кемсітушілік сипаттағы әрі қосарланған стандарттарға негізделген саясат деп бағалап отыр. Хэ Ядунның сөзінше, Бейжің Еуроодақтың өз ішінде де өндірістік қуат мәселесіне қатысты тергеулер жүргізіліп жатқанын назарға алған.
— Еуроодақ өз өндірушілері мен қытайлық компанияларға қатысты әртүрлі тәсіл қолданбауы тиіс, — деді Қытай Сауда министрлігінің өкілі.
Ал Еуропалық одақ тарапы мұндай шаралар еуропалық нарықты әділетсіз бәсекеден және Қытай импортына шамадан тыс тәуелділіктен қорғауға бағытталғанын мәлімдеп отыр.
Сарапшылардың пікірінше, Бейжің мен Брюссель арасындағы сауда қайшылығы алдағы уақытта жаһандық нарықтағы экономикалық қатынастарға әсер етуі мүмкін. Әсіресе жоғары технология, электр көліктері және өнеркәсіп өнімдері саласында бәсекелестік күшейіп келеді.
#Қытай #Еуроодақ #Сауда #Экономика #Бейжің #Брюссель #Импорт #Санкция #Munarmedia