Munarmedia.kz 27.04.2026/Astana/ — Қазақстан астанасында «Энергия Астаны» экопаркін құруға бағытталған инвестициялық жобаға ресми түрде старт берілді. Бұл туралы ҚР Сыртқы істер министрлігінің баспасөз қызметі хабарлады.
Аталған жоба аясында қалдықтарды өңдеп, электр энергиясын өндіретін кешен салу және оны кейін пайдалану көзделіп отыр. Құжат Қазақстан Республикасы Сыртқы істер министрлігі жанындағы Инвестициялар комитеті мен қытайлық East Hope компаниясы арасында жасалған.
Жоспарға сәйкес, нысанды пайдалануға беру 2029 жылдың екінші жартысына белгіленген. Бастапқы кезеңде кәсіпорын тәулігіне шамамен 1,5 мың тонна қалдықты өңдеп, 50 мегаваттқа дейін электр энергиясын өндіре алады.
Құрылыс кезеңінде 250-ге жуық адамды жұмыспен қамту жоспарланып отыр. Ал жоба іске қосылғаннан кейін 125 адам тұрақты жұмыс орнымен қамтамасыз етіледі.
Комитет өкілдерінің мәліметінше, мұндай жобаларды жүзеге асыру экологиялық талаптарды сақтау мен инфрақұрылымның технологиялық деңгейін арттыруға бағытталған.
#Munarmedia #Астана #Инвестиция #Экопарк #ЖасылЭнергия #Қытай #Экология