Сиэтл қаласындағы (Вашингтон штаты) федералды сот төрешісі АҚШ президенті Дональд Трамптың АҚШ-та туылғандарға азаматтық беруді шектейтін (яғни, "жер құқығы" деп аталатын) жарлығының күшін уақытша тоқтатты.
Хабарланғандай, сот Вашингтон, Иллинойс, Орегон және Аризона штаттарының бас прокурорлары берген талап-арыздарды қарастырды. Олар Трамптың жарлығы 150 мыңнан астам баланы құқықтарынан айырып, кейбірін азаматтықсыз қалдыратынын мәлімдеді.
"Бұл - Конституцияға қайшы келетін өрескел жарлық",
– деп мәлімдеді сот тыңдалымында төреші Джон Коэнур.
Дональд Трамп 20 қаңтарда Ақ үйге қайта оралғаннан кейін ондаған жарлыққа қол қойды, олардың бірі жер құқығына негізделген азаматтық алуды жоюға бағытталған еді. Бұл қағидаға сәйкес, ел аумағында дүниеге келген кез келген адам автоматты түрде сол елдің азаматы болып саналады. Жер құқығы АҚШ Конституциясының 14-ші түзетуімен кепілдендірілген.
Associated Press агенттігінің түсіндіруінше, Трамптың жарлығы бойынша, егер АҚШ-та туған баланың анасы елде заңсыз жүрген болса немесе әкесі АҚШ азаматы емес әрі елде тұрақты және заңды түрде тұрмаған болса, мұндай бала автоматты түрде азаматтық ала алмайды. Сонымен қатар, АҚШ аумағында заңды негізде уақытша болған аналардың, егер әкесі АҚШ азаматы немесе елде заңды түрде тұрақты тұратын адам болмаса, балаларына да автоматты азаматтық берілмейді.
Трамптың жарлығына 22 америкалық штаттың бас прокурорлары қарсылық білдірді.