АСТАНА.18.05.2026.Munarmedia.kz – АҚШ-тың бұрынғы президенті Дональд Трамп Қытайдағы бірқатар мұнай өңдеу зауыттарына салынған санкцияларды жақын күндері алып тастауы мүмкін екенін мәлімдеді.
Оның айтуынша, бұл мәселе Қытай төрағасы Си Цзиньпинмен өткен кездесуде талқыланған. Санкциялар АҚШ Қаржы министрлігі тарапынан Иран мұнайын сатып алғаны үшін енгізілген болатын.
Салалық сарапшылардың мәліметінше, соңғы екі жылда Қытайдың бес ірі тәуелсіз мұнай өңдеу зауыты америкалық шектеулерге ілінді. Олардың қатарында 2026 жылдың сәуірінде санкцияланған Hengli (Dalian), 2025 жылдың қазанындағы Shandong Jincheng Petrochemical, 2025 жылдың мамырындағы Hebei Xinhai Chemical, 2025 жылдың наурызындағы Shouguang Luqing Petrochemical және 2026 жылдың сәуіріндегі Shandong Shengxing Chemical компаниялары бар.
Аталған кәсіпорындардың барлығы жеке меншікке тиесілі және Қытайдағы тәуелсіз мұнай өңдеу зауыттары – «самоварлар» санатына жатады. Олар негізінен Шаньдун провинциясында орналасқан. Ең ірі нысан – тәулігіне 400 мың баррель мұнай өңдейтін Далянь қаласындағы Hengli мұнай өңдеу зауыты.
АҚШ бұл зауыттарды Иран мұнайымен жұмыс істегені үшін санкциялық тізімге енгізген.
Биылғы мамыр айының басында Вашингтонның шектеулеріне жауап ретінде Бейжің арнайы қаулы қабылдап, Қытай компанияларына АҚШ санкцияларын орындауға тыйым салған еді.
Сарапшылардың бағалауынша, Қытайдағы тәуелсіз мұнай өңдеу зауыттары елдің ішкі жанармай нарығында маңызды рөл атқарады. Олар мұнай өнімдеріне деген ішкі сұраныстың шамамен 25 пайызын қамтамасыз етеді.
Сонымен қатар, 2025 жылдың алғашқы жартысында Қытайда өндірілген бензин мен дизельдің 39 пайызы дәл осы тәуелсіз зауыттардың үлесіне тиесілі болған.
#Трамп #Қытай #АҚШ #Санкция #Иран #Мұнай #Экономика #Munarmedia