Munarmedia.kz. 5 мамыр 2025 жыл, Астана – Балалар күніне орай жарияланған ресми деректерге сәйкес, Жапонияда 14 жасқа дейінгі балалар саны қатарынан 44-ші жыл төмендеп, алғаш рет 14 миллионнан азайған.
Елдің Ішкі істер министрлігінің дерегінше, 2025 жылғы 1 сәуірдегі жағдай бойынша Жапонияда 14 жасқа дейінгі балалар саны 13,66 миллионды құрады. Бұл өткен жылмен салыстырғанда 350 мыңға аз.
Жыныстық құрамға тоқталсақ, елде 6,99 миллион ұл бала, 6,66 миллион қыз бала бар. 12–14 жас аралығындағы балалар саны 3,14 миллионды құраса, одан кіші жастағылардың саны жыл сайын азайып келеді. Атап айтқанда, 0–2 жас аралығындағы балалар саны небәрі 2,22 миллион.
Жапония халқының жалпы санының 11,1 пайызын балалар құрап отыр. Бұл — қатарынан 51-ші жыл төмендеп отырған көрсеткіш және өткен жылмен салыстырғанда 0,2 пайыздық пунктке аз.
2024 жылғы 1 қазандағы деректер бойынша, елдің оңтүстік-батысындағы Окинава префектурасында балалардың үлесі ең жоғары болып, 15,8 пайызға жеткен. Одан кейінгі орындарда Шига және Сага префектуралары — әрқайсысы 12,7 пайызбен. Ал елдің солтүстігіндегі Акита префектурасында балалар саны ең аз – небәрі 8,8 пайыз, Аоморида – 9,8 пайыз, ал Хоккайдода – 9,9 пайыз болған.