Munarmedia.kz 11.02.2026 ж. /Астана/ -Бүгін Берлинде Германияның Сыртқы істер министрі Йоханн Вадефуль Түрікменстан, Тәжікстан, Қырғызстан, Өзбекстан және Қазақстанның сыртқы саясат ведомстволарының басшыларымен кездесу өткізеді.
Кездесу күн тәртібіне энергетика мәселелері мен Ресейге қарсы енгізілген санкцияларды айналып өту тәуекелдері енгізілгені хабарланды.
Германия Сыртқы істер министрлігінің өкілдері Орталық Азия елдері Германия үшін барған сайын маңызды әріптестерге айналып келе жатқанын атап өтті. Бұл, ең алдымен, энергетика, ресурстармен қамтамасыз ету, климаттық саясат және санкцияларды айналып өтуге қарсы іс-қимыл салаларына қатысты.
Сонымен бірге ресми Берлин Еуроодақ тарапынан аймақ елдеріне қатысты санкциялар енгізуді қолдай ма, жоқ па — бұл жөнінде нақты мәлімет берілген жоқ.
2022 жылдан кейін Германия мен Орталық Азияның кейбір елдері арасындағы сауда айналымы айтарлықтай өскен. Бұл жеткізу тізбектеріне қатысты бақылаудың күшеюіне себеп болды.
Берлин қазіргі уақытта энергетикалық әртараптандыруға және шикізат ресурстарына, соның ішінде Қазақстан ресурстарына қол жеткізуге мүдделі екені айтылып отыр.
Еуроодақ Ресейге қарсы 20-санкциялық пакетті дайындап жатыр. Сарапшылардың айтуынша, алғаш рет шектеулер Орталық Азияның жекелеген елдеріне, атап айтқанда Қырғызстанға қатысты болуы мүмкін.
Еуропалық билік өкілдері аймақтағы кейбір компанияларды Еуроодақтан әкелінген тауарларды Ресейге қайта экспорттауы мүмкін деп күдіктенеді.