Қазіргі әлемде мемлекеттердің қуаты тек экономикасымен немесе әскери әлеуетімен өлшенбейді.
Ең басты капитал – халықтың мемлекетке деген сенімі.
Сенім бар жерде тұрақтылық болады, инвестиция келеді, реформалар жүзеге асады.
Ал сенім әлсіреген жерде кез келген жақсы бастама күмәнмен қабылданады.
Қазақстан үшін бүгінгі ең маңызды міндеттердің бірі – қоғамдағы сенім институттарын нығайту.
Бұл тек мемлекеттік органдардың жұмысына ғана емес, саяси партияларға, бұқаралық ақпарат құралдарына, қоғамдық ұйымдарға және әрбір азаматқа қатысты мәселе.
Сенімнің басты негізі – әділет.
Егер заң бәріне бірдей жұмыс істесе, мемлекеттік шешімдер ашық қабылданса, халықтың пікірі ескерілсе, онда қоғамда жауапкершілік мәдениеті қалыптасады.
Керісінше, қос стандарт көрініс берсе, азаматтардың мемлекетке деген сенімі әлсірейді.
Бүгінде ақпараттық кеңістіктегі ең үлкен сын-қатердің бірі – жалған ақпарат емес, шынайы ақпаратқа деген сенімнің төмендеуі. Сондықтан билік пен қоғам арасындағы диалог біржақты ақпарат таратумен шектелмеуі тиіс. Ол нақты нәтиже беретін кері байланысқа негізделуі қажет.
Президент ұсынған «Заң мен Тәртіп» қағидаты тек құқық қорғау саласының емес, мемлекеттік басқарудың да негізгі ұстанымына айналғанда ғана оның нақты нәтижесі көрінеді.
Қазақстанның болашағы жаңа ғимараттармен немесе жаңа бағдарламалармен ғана емес, азаматтардың мемлекетке деген сенім деңгейімен айқындалады.
Ал сенімнің ең қысқа жолы – әділетті шешім, ашық басқару және жауапкершілік.
Мемлекеттің тұрақтылығы күшпен емес, халықтың сенімімен қамтамасыз етіледі.
Сондықтан бүгінгі күннің ең маңызды реформасы – қоғамдық сенімді қалпына келтіру және оны нығайту.
Баяжума Асылбек
Саясаттанушы