АСТАНА.16.05.2026.Munarmedia.kz – Израиль премьер-министрі Биньямин Нетаньяху Біріккен Араб Әмірліктеріне құпия сапармен барып, БАӘ президенті Мұхаммед бен Заид Әл Нахаянмен кездескені хабарланды. Бұл туралы Израиль премьер-министрінің кеңсесі мәлімдеді.
Ресми ақпаратқа сәйкес, тараптар аймақтағы қауіпсіздік, қорғаныс саласындағы ынтымақтастық және Таяу Шығыстағы геосаяси ахуалды талқылаған. Алайда сапар жөніндегі мәлімет жария болғаннан кейін Біріккен Араб Әмірліктері бұл ақпаратты ресми түрде жоққа шығарды.
Сарапшылардың пікірінше, соңғы жылдары Израиль мен БАӘ арасындағы байланыс айтарлықтай күшейген. Бұған 2020 жылы қол қойылған Авраам келісімдері негіз болған. Аталған келісімдер арқылы екі мемлекет дипломатиялық және экономикалық қарым-қатынасты ресми түрде жолға қойған еді.
БАҚ-та тараған мәліметтерге қарағанда, Иранмен байланысты өңірлік шиеленістер кезінде БАӘ аумағындағы америкалық нысандар бірнеше мәрте шабуыл қаупіне ұшыраған. Осыған байланысты Абу-Даби Израильдің әуе қорғаныс жүйелері мен әскери мамандарына қызығушылық танытқаны айтылуда.
Саясаттанушылар Парсы шығанағындағы мемлекеттер арасында көзқарас айырмашылығы тереңдеп келе жатқанын атап өтеді. Кейбір араб елдері Израильмен қарым-қатынасты нығайтуды қолдаса, енді бірі бұл саясатқа сақтықпен қарап отыр.
Әзірге Біріккен Араб Әмірліктері тарапы Нетаньяхудың сапары жөнінде қосымша түсініктеме берген жоқ. Ал Израиль билігі кездесудің өңірлік тұрақтылық пен қауіпсіздік мәселелеріне арналғанын мәлімдеуде.
#Нетаньяху #БАӘ #Израиль #ТаяуШығыс #АвраамКелісімдері #Геосаясат #Munarmedia