Munarmedia.kz 13.05.2026. АСТАНА – Қазақстанда сирек кездесетін өсімдіктерді заңсыз жұлу немесе жою фактілері үшін ірі көлемде айыппұл қарастырылған. Бұл туралы Экология және табиғи ресурстар вице-министрі Нұркен Шәрбиев мәлімдеді.
Оның айтуынша, әлеуметтік желілерде тараған «бақбақ жұлғаны үшін 13 млн теңге айыппұл салынады» деген ақпарат толықтай шындыққа сәйкес келмейді.
Вице-министрдің түсіндіруінше, 3000 айлық есептік көрсеткіш көлеміндегі жаза Қазақстанның Қызыл кітабына енген сирек өсімдік – көксағызды жойған жағдайда ғана қолданылады. Бұл өсімдік еліміздің оңтүстік өңірлерінде өседі және ерекше қорғауға алынған.
Ал кәдімгі арамшөп саналатын қарапайым бақбақтарға мұндай тыйым жүрмейді.
Министрлік мәліметінше, мұндай қатаң шаралар жойылып кету қаупі бар өсімдіктер дүниесін сақтау мақсатында енгізілген. Олардың қатарында жабайы қызғалдақ түрлері де бар. Сирек кездесетін қызғалдақтарды заңсыз жұлу немесе зақымдау фактілері үшін де бірнеше миллион теңге көлемінде айыппұл қарастырылған.
Экологтар азаматтарды табиғатқа ұқыпты қарап, қорғалатын өсімдіктерге зиян келтірмеуге шақырды.
#Қазақстан #Экология #ҚызылКітап #Көксағыз #Қызғалдақ #Айыппұл #Табиғат #Munarmedia #Жаңалықтар