Munarmedia.kz 24.04.2026 /Astana/ – Қазақстанның Энергетика министрлігі «Karaganda Wind Power» компаниясымен (қытайлық China Gezhouba Group еншілес ұйымы) жел электр станциясын салу бойынша инвестициялық келісімге қол қойды.
Жоба Қарағанды облысында жүзеге асырылмақ. Болашақ станцияның қуаты 500 мегаваттқа дейін жетеді деп жоспарлануда.
Жобаның жалпы инвестиция көлемі 645 млн АҚШ долларын құрайды. Күтілетін өндіріс көлемі – жылына 1,6 млрд киловатт-сағат электр энергиясы.
Әзірге құрылыс жұмыстарының басталу мерзімі мен нысанды пайдалануға беру уақыты нақты жарияланған жоқ.
Бұған дейін сарапшылардың мәліметінше, 2025 жылдың қорытындысы бойынша Қазақстанда электр энергиясының тапшылығы 1,5 млрд киловатт-сағатқа жеткен.
#Қазақстан #Энергетика #ЖелЭлектрСтанциясы #Қытай #Инвестиция #Қарағанды #ЖасылЭнергия #Kazinform #Munarmedia