Munarmedia.kz-13.11.2026ж/Астана/-Астанада Ұлттық қауіпсіздік комитетінің қызметкерлері «Самұрық-Қазына» ұлттық әл-ауқат қорының басқарма төрағасы Нұрлан Жақыпов пен «Қазақстан темір жолы» ұлттық компаниясының басшысы Елжас Отынышевті ұстағаны туралы ақпарат тарады. БАҚ мәліметінше, оларға сыбайлас жемқорлыққа қатысты күдік келтірілген. Алайда тергеудің нақты жай-жапсары әзірге жарияланған жоқ.
Осы оқиғаға байланысты әлеуметтік желілерде Астананың орталығындағы тұрғын үй кешенінің терезесінен лақтырылған ақша салынған чемодандар мен сөмкелер түсірілген бейнежазбалар тарады. Кадрлардан оқиға орнын полиция қызметкерлерінің қоршауға алғанын көруге болады. Бірқатар қазақстандық БАҚ бұл жағдайды қос компания басшыларының ұсталуымен байланыстырады. Алайда бұл байланыстың ресми расталғаны туралы ақпарат жоқ.
Саяси шолушылар аталған оқиғаны квазимемлекеттік сектордағы басқару жүйесіне қатысты маңызды белгі ретінде бағалап отыр. Олар биыл ақпан айында Қасым-Жомарт Тоқаевтың «Самұрық-Қазына» басшылығын басқару аппаратының шамадан тыс ұлғайғаны үшін сынға алғанын еске салды.
Сондай-ақ сарапшылар бұған дейін КТЖ-ны басқарған, кейін Көлік министрі болған Нұрлан Саурнабаевтың жуырдағы қызметінен босатылуына назар аударуда. Алайда оның қазіргі оқиғаларға қатысы бар екені жөнінде ресми мәлімет жоқ.
Саясаттанушы Алмас Әубекеров бұл жағдайды бүкіл квазимемлекеттік сектор басшыларына берілген ескерту ретінде қарастырады. Оның пікірінше, алдағы уақытта инфрақұрылымға қомақты қаржы салынатындықтан, ұлттық компаниялардың басшылары әрбір келісімшарт пен қаржылық шешім үшін жауап беруі тиіс.
Президенттің баспасөз хатшысы Айбек Смадияровтың хабарлауынша, 13 қарашада Қасым-Жомарт Тоқаев Көлік-логистика саласын дамыту мәселелері бойынша Қауіпсіздік Кеңесінің жедел кеңесін өткізуді жоспарлап отыр. Жиында мемлекет басшысы елдегі ірі екі құрылым басшыларының ұсталуына байланысты мемлекеттің ұстанымын білдіреді деп күтілуде.
Сарапшылардың пікірінше, мұнай-газ саласындағы өсімнің баяулауына байланысты Қазақстан транзиттік-логистикалық әлеуетін дамытуға басымдық беріп отыр. Сондықтан ұлттық компаниялар басшыларының жеке жауапкершілігі мен мемлекеттік қаржының жұмсалу ашықтығы алдағы кеңестің негізгі тақырыптарының бірі болуы мүмкін.
#Қазақстан #Астана #СамұрықҚазына #ҚТЖ #СыбайласЖемқорлық #ҰҚК #Транзит #Логистика