Ауғанстанның Жоғары білім министрлігі 500 студентке Ресейге оқуға баруға тыйым салды. Бұл туралы сенбі күні талибтер режиміне оппозициялық «Хашт-е Собх» газеті хабарлады.
«Соңғы үш жылда талибтер* ауған қыздары мен әйелдерін әлеуметтік, білім беру және ғылыми өмірден толықтай шеттетіп қана қоймай, ер адамдарға да көптеген шектеу қойды. Бұл топ жүздеген студенттің Ресейге шығуына тосқауыл жасап, студенттер "Ресейге мұсылман болып кетеді, ал оралысында коммунист болып келеді" деп мәлімдеді», – деп жазады басылым.
Ресей стипендиясына үміткерлер 2023 жылы тіркелгендерін және 2024 жылы емтихандарды сәтті тапсырғаннан кейін барлық әкімшілік рәсімдерді аяқтағандарын айтады. Алайда қазір талибтер* идеологиялық себептерді алға тартып, олардың Ресейге баруға рұқсат алуына кедергі келтіріп отыр. Студенттердің айтуынша, жалпы кедейлік пен жұмыссыздыққа қарамастан, әрқайсысы сапарға қажетті құжаттар мен медициналық тексерулер үшін 100-150 АҚШ долларын төлеген.
«Студенттердің сөзінше, бірнеше ай бойы күтумен және көптеген кездесулермен өткен уақыттан кейін, жақында Ресей елшісі мен Кабулдағы Ресей ғылым және мәдениет үйінің басшысы оларға мәселенің Ресей тарапынан емес екенін мәлімдеген. Ресей елшілігінің өкілдері бұл стипендияларды алуға дәл Жоғары білім министрлігі кедергі жасап отырғанын және ешбір студенттің оларға қол жеткізуіне жол бермеуді бұйырғанын хабарлаған», – деп жазады газет.
Газеттің мәліметінше, студенттер Ресей үкіметін «Талибан»* қозғалысымен бұл мәселені шешу үшін ынтымақтасуға шақырады. Олардың айтуынша, бұған дейін де талибтер ауған студенттерінің Ресейде білім алуына тосқауыл қойған, бірақ Ресей Иран арқылы білім визаларын алуға және тиісті университеттерге түсуге көмектескен.
(*) Талибан қозғалысы Қазақстанда және бірқатар елдерде террористік ұйым деп танылған.