Munarmedia.kz 25.02.2026 /Астана/ - Даулы айыппұлдардың жалпы сомасы 345 миллион теңгеден асып кеткен.
Прокуратураның тексеруі барысында айыппұлдар заң талаптарын бұза отырып салынуы мүмкін екені белгілі болды. Әңгіме жекелеген қателіктер туралы емес, тұрғындарды жаппай әкімшілік жауапкершілікке тарту фактілері жайында болып отыр. Нәтижесінде ондаған мың азаматтың құқығы бұзылған.
Даудың басы қаладағы Сүлейменов көшесінде орнатылған сағатына 40 шақырым жылдамдықты шектеу белгісінен басталған. Бейнебақылау камералары жылдамдықты асырғандарды тіркеп, жүргізушілерге айыппұл қаулылары жіберілген. Көпшілік айыппұлды заңдылығына күмән келтірместен төлей берген. Алайда жол белгісінің өзі заңсыз орнатылуы мүмкін екені кейін анықталған.
Бұл мәселеге алғаш болып тараздық тұрғын Рүстенбек Өмірзахов назар аударып, прокуратураға жүгінген. Тексеру нәтижесінде жылдамдық шектеуі тиісті келісімдерсіз және жол-көлік жағдайына талдау жасалмай енгізілгені белгілі болды. Яғни жүргізушілер заң талаптары сақталмай қабылданған шешім негізінде жазаланған.
Ауқымы да айтарлықтай: бір ғана нүктеде 32 260 әкімшілік хаттама толтырылып, жалпы сомасы 345 349 309 теңге өндірілген.
Кейін жол белгісі алынып тасталғанымен, шығарылған қаулылар күшінде қалған, ал жүргізушілерге төленген қаражат қайтарылмаған.
Тараз қаласының тұрғыны Светлана Бояркина айыппұлды сот арқылы даулап, істі жеңіп шыққан. Сот жол қозғалысын ұйымдастыру кезінде заң талаптары сақталмағанын атап өткен. Полиция бұл шешімге шағым түсірмеген.
Соған қарамастан, айыппұлдарды жаппай жою мәселесі шешілмей отыр. Көптеген жүргізушілер өздерінің заңсыз жауапкершілікке тартылғанын білмеуі де мүмкін.
Енді полиция департаменті анықталған заңбұзушылықтарды жойып, прокурорлық қадағалау актісін қарауы тиіс. Оның ішінде өндірілген қаражатты қайтару мәселесі де бар.
Полиция өкілдері жол белгілерін орнату — әкімдік құзыретінде екенін мәлімдеді. Ал әкімдік өз кезегінде мұндай жұмыстар полицияның ұйғарымы негізінде жүргізілетінін алға тартты.
Сөйтіп, жүздеген миллион теңгенің өндіріліп алынуына кім жауап беретіні және бұл қаражат жүргізушілерге қайтарыла ма деген сұрақ әзірге ашық күйінде қалып отыр.