Бұл туралы Bloomberg, AFP, Reuters, Fox News және басқа да бұқаралық ақпарат құралдары Ақ үй өкіліне сілтеме жасап хабарлады, деп жазады BBC-дің орыс қызметі.
Bloomberg мәліметінше, бұл шешім Украинаға әлі жеткізілмеген барлық америкалық әскери жабдықтарға қатысты. Оның ішінде жолда келе жатқан немесе Польша арқылы транзитті күтіп тұрған қару-жарақ та бар.
«Президент бейбітшілікке ұмтылатынын ашық түрде көрсетті. Бізге серіктестеріміздің де осы мақсатқа адал болғаны маңызды. Біз көмекті уақытша тоқтатып, қайта қарастырып жатырмыз, оның шынымен де жағдайды шешуге септігін тигізетініне көз жеткізуіміз қажет», – делінген ресми мәлімдемеде.
Дегенмен Fox News әкімшілік өкіліне сілтеме жасап, бұл әскери көмектен толық бас тарту емес, тек уақытша кідіріс екенін атап өтті. Көмек Трамп Украина басшылығының бейбітшілікке шын ниеті бар екеніне көз жеткізгенге дейін тоқтатылады.
АҚШ-та Украинаны қаржыландыруды тоқтату мәселесі Ақ үйдегі жанжалдан кейін талқылана бастады. 28 ақпанда Дональд Трамп пен Владимир Зеленский кездескен болатын. Екі ел басшыларының әңгімесі қызу пікірталаспен аяқталды.
Зеленский Ақ үйден мерзімінен бұрын шығып кетті, ал сирек кездесетін минералдар жөніндегі келісімге қол қойылған жоқ.
• Фото: Pixabay.