Munarmedia.kz.07.08.2025 ж. /Астана/-Түркімен блогері Талыб Абасов Ашхабадта болған тергеу кезінде азаматтың қаза табуына елдің құқық қорғау органдарын кінәлап отыр. Оның айтуынша, 25 шілдеге қараған түні Түркіменстан ІІМ-нің есірткінің заңсыз айналымына қарсы күрес бөлімі Сүлейман Чариев пен оның бауырын ұстаған.
Блогердің дерегінше, ағайынды екеу Житников көшесінде орналасқан Ішкі істер министрлігі ғимарат кешеніне жеткізіліп, психобелсенді заттардың заңсыз айналымы бойынша сұралған. Бір сағаттық тергеуден кейін Чариевтің бауыры босатылған, ал Сүлейманға тергеу жалғасып, ол тыйым салынған дәрі-дәрмектерді сақтағанын мойындаған.
Алайда Сүлейман Чариев допростан соң көз жұмған. Блогер Абасовтың айтуынша, оның өліміне тергеу барысында қолданылған электрошокер арқылы азаптау себеп болған.
Сүлейман Чариевтің ықпалды туыстары бар екені де аталып өтті: ол – бұрынғы вице-премьер, Түркіменстан Президенті аппаратының істер басқармасының басшысы Ходжамұхаммед Мұхаммедовтың жиені. Сонымен қатар, Чариев жақында ғана Халк Маслахаты төрағасы Гурбангулы Бердымұхамедовтің бір туысына жеке жүргізуші болған.
Адам құқықтарын қорғаушылардың айтуынша, азаптауға тікелей қатысы бар полиция қызметкерлері – «Эзиз-гөк, Мейлис, Рахим» есімді жедел уәкілдер және бөлім бастығы Ровшен. Бұдан бөлек, Житниковтағы осы мекемеде тағы үш адамның азаптау нәтижесінде қаза тапқаны, ал Түркіменстан Бас прокуратурасы ғимаратында Аркадаг қаласы бойынша экономикалық қылмыстармен күрес бөлімінің қызметкері Рахман Бяшимовтың соққыға жығылып өлтірілгені жайлы деректер келтірілді.
Аталған жағдай бойынша Түркіменстан билігі немесе басқа ресми дереккөздер әзірге ешқандай түсініктеме берген жоқ.