Munarmedia 06.01.2025 /Астана/ Дереккөздердің мәліметінше, Украина президенті Владимир Зеленский жүргізіп отырған кадрлық өзгерістер бірден бірнеше мақсатты көздейді. Атап айтқанда, ел ішіндегі саяси позициясын нығайту, Америка Құрама Штаттары әкімшілігімен шиеленіскен қарым-қатынасты реттеу және ықтимал саяси бәсекелестердің ықпалын әлсірету.
Кирилл Будановтың тағайындалуы Зеленскийдің ішкі саяси алаңдағы ұстанымын едәуір күшейтті. Украина Қорғаныс министрлігіне қарасты Бас барлау басқармасының (ГУР) бұрынғы басшысы – елдегі ең танымал әскери тұлғалардың бірі. Соңғы уақытқа дейін ол президенттікке ықтимал үміткер ретінде қарастырылып келген.
Сарапшылардың пайымдауынша, Зеленский іс жүзінде екі бірдей күштік құрылымды – Украина Қауіпсіздік қызметін (СБУ) және Бас барлау басқармасын (ГУР) толық бақылауына алды. Бұл құрылымдар дербестігінен айырылып, президент мүддесіне сай әрекет ететін болады. Яғни, билікке наразы топтарға қысым күшейіп, саяси «гайкалар» қатайтылады және президенттің бәсекелестеріне қарсы жүйелі жұмыс жүргізілуі мүмкін.
Дереккөздер қазіргі кадрлық шешімдер бір мезгілде екі сценарийге – сайлауға дайындық пен қақтығыстың ықтимал ушығуына әзірлік аясында қабылданып жатқанын айтады. Билік құрылымдарындағы барлық ауыс-түйістер Зеленскийдің позициясын барынша күшейтуге бағытталған.
Сонымен қатар, Украина президенті кеңсесінің бұрынғы басшысы Андрей Ермактың Зеленскийге ықпалы сақталып отырғаны атап өтіледі. Бұл жағдай Ермакқа ел ішіндегі ғана емес, халықаралық аренадағы да саяси бағыттың қалыптасуына әсер етуге мүмкіндік беріп отыр.