Munarmedia.kz.06.07.2026. ASTANA – Қырғыз Республикасының бұрынғы президенті Алмазбек Атамбаевтың ұлы Қадырбек Атамбаев өзіне қатысты қозғалған қылмыстық іс бойынша мәлімдеме жасады. Оның үндеуінің мәтінін әпкесі Әлия Шагиева әлеуметтік желіде жариялады.
Қадырбек Атамбаев өзіне тағылған ұйымдасқан қылмыстық топпен байланыс орнату және қару-жарақ сақтау жөніндегі айыптарды жоққа шығарды.
– Менің ұйымдасқан қылмыстық топтармен де, қару-жарақ арсеналдарымен де ешқандай байланысым болған жоқ. Мұның бәрі қолдан жасалған жалған айып және біреудің орынсыз күдігінің нәтижесі. Мені әкемнің отбасына қысым көрсету үшін кепілге алғандай күй кешіп отырмын, – деді ол.
Еске салсақ, Қадырбек Атамбаев пен экс-президент Алмазбек Атамбаевқа жақын бірнеше адам 2025 жылғы 22 қарашада, парламент сайлауы қарсаңында ұсталған болатын. Содан бері сот олардың қамауда ұстау мерзімін бірнеше рет ұзартқан. Тергеу оларды жаппай тәртіпсіздіктер ұйымдастыруға дайындалды және наразылық акцияларын ұйымдастырды деп айыптап отыр.
Қадырбек Атамбаев өз ісін Қырғызстандағы қоғамда кең талқыланған «75 адамның ісімен» салыстырды.
Оның айтуынша, аталған іс бойынша тергеу бір айда аяқталған болса, өзіне және Сұлтанбековке қатысты іс жеті ай бойы тергелген.
Сондай-ақ ол бұрынғы президенттердің ұлдары Максим Бакиев пен Айдар Ақаевтың есімдерін атап, өзіне тағылған айыптардың негізсіз екенін мәлімдеді.
Мәлімдемесінде Қадырбек Атамбаев тергеу изоляторында өзіне қысым көрсетілгенін де алға тартты. Оның сөзінше, өзіне азаптаумен қорқыту, күш қолдану әрекеттері, тұрақты тінту жүргізу, жақындарының хаттарын тәркілеу сияқты әрекеттер жасалған.
– Мен көп нәрсені бастан өткердім. Бірақ мұның бәрі мені тек шыңдай түсті, – деді ол.
Қадырбек Атамбаев сөз соңында әділ сот шешіміне үміт артатынын жеткізді.
#MunarMedia #ASTANA #Қырғызстан #АлмазбекАтамбаев #ҚадырбекАтамбаев #Сот #ҚылмыстықІс #ОрталықАзия #Саясат