Munarmedia.kz | 23.06.2026 | ASTANA Ақмола облысының Зеренді ауданындағы Айдабол көлінде балықтардың жаппай қырылу дерегі тіркелді. Оқиғаның себептерін анықтау үшін көл аумағына арнайы комиссия жіберілді.
Тексеру жұмыстарына Есіл өңіраралық бассейндік балық шаруашылығы инспекциясының мамандары, ветеринариялық қызмет өкілдері және Ақмола облыстық экология департаментінің қызметкерлері қатысуда.
Мамандар су айдынын тексеру барысында судан және қырылған балықтардан сынамалар алып, оларды зертханалық сараптамаға жолдады.
Ақмола облысының ветеринария басқармасының мәліметінше, зертханалық зерттеулер аяқталғаннан кейін балықтардың қырылуына нақты қандай факторлар әсер еткені белгілі болады.
Әзірге жергілікті тұрғындар арасында оқиғаның себептері жөнінде түрлі болжамдар айтылып жатыр. Соның ішінде ең ықтимал нұсқалардың бірі ретінде өңірде қалыптасқан аптап ыстық салдарынан су температурасының күрт көтерілуі көрсетілуде. Қазіргі таңда өңірде күндіз ауа температурасы +34 градусқа дейін жетсе, түнгі уақытта +20 градустан төмен түспей тұр.
Куәгерлердің айтуынша, жаппай қырылу негізінен пелядь балығына әсер еткен. Бұл — салқын суды мекендейтін, су температурасының жоғарылауына және оттегінің азаюына өте сезімтал балық түрі.
Мамандар зертханалық қорытынды шыққанға дейін нақты себептер туралы түпкілікті пікір білдіруге ерте екенін атап өтті. Тиісті мемлекеттік органдар жағдайды бақылауда ұстап отыр.
#АқмолаОблысы #Зеренді #АйдаболКөлі #БалықҚырылуы #Экология #Ветеринария #Табиғат #ҚоршағанОрта #MunarMedia #ASTANA