Munarmedia.kz | 27.08.2026 | ASTANA — АҚШ билігі әлемнің барлық елдерінен иммиграциялық виза алуға өтініш берушілер үшін сұхбат тағайындауды уақытша тоқтатты. Бұл шешім Дональд Трамп әкімшілігінің көші-қон саясатын одан әрі қатаңдату аясында қабылданып отыр.
Reuters агенттігінің хабарлауынша, АҚШ Мемлекеттік департаменті америкалық елшіліктер мен консулдықтардың қызметкерлеріне арналған жаһандық оқыту бағдарламасын іске қосқан. Оқыту кезеңінде визалық қабылдау кестесіне өзгерістер енгізіледі.
Бұған дейін тағайындалған сұхбаттар кейінге шегеріледі
Financial Times мәліметінше, сұхбаттасу күні алдын ала белгіленген кейбір өтініш берушілер кездесулердің кейінге қалдырылғаны туралы хабарлама ала бастаған. Жаңа күндер туралы ақпарат кейінірек беріледі.
АҚШ Мемлекеттік департаменті оқыту бағдарламасының нақты мерзімі мен мазмұнын ашып айтқан жоқ. Ведомствоның мәліметінше, оқыту консулдық қызметкерлерге мемлекеттік әлеуметтік төлемдерге тәуелді болуы ықтимал өтініш берушілерді анықтауға және виза алуға үміткерлерді «жан-жақты әрі дәйекті» бағалауға көмектесуге бағытталған.
Трамп әкімшілігі көші-қон саясатын күшейтті
Дональд Трамптың екінші президенттік мерзімінде АҚШ-та заңсыз көші-қонға қарсы ауқымды науқан жүріп жатыр. Әкімшілік визалар мен «жасыл карталарды» (Green Card) жою, сондай-ақ кейбір өтініштерді қабылдамау шараларын күшейтті. Мұндай шешімдер арасында өтініш берушілердің саяси көзқарастары мен пропалестиналық наразылықтарға қатысуына қатысты жағдайлар да бар.
Сонымен қатар әкімшіліктің көші-қон саясаты бірқатар сот процестеріне тап болды. Бұған дейін сот АҚШ Мемлекеттік хатшысы Марко Рубионың 75 ел азаматтарына иммиграциялық виза беруді тоқтату туралы шешімін өкілеттілік шегінен асып кеткен деп танып, оның күшін жойған.
Қазіргі уақытта АҚШ Мемлекеттік департаменті бүкіл әлем бойынша иммиграциялық виза сұхбаттарын қайта тағайындаудың нақты мерзімін жариялаған жоқ.
#Munarmedia #ASTANA #АҚШ #АмерикаҚұрамаШтаттары #ИммиграциялықВиза #Виза #КөшіҚон #ДональдТрамп #АҚШМемлекеттікДепартаменті #Миграция #ХалықаралықЖаңалықтар #ӘлемЖаңалықтары