Munarmedia.kz 07.08.2026. ASTANA АҚШ-тың The New York Times басылымы дереккөздеріне сілтеме жасап, Орталық барлау басқармасы (ЦРУ) Кубаға қатысты арнайы жедел топ құрғанын хабарлады.
Басылымның мәліметінше, жаңа құрылым қызметкерлерді, оның ішінде агенттерді іріктеу және үйлестіру мамандарын, кибероперациялар мен қысым көрсетуге бағытталған операцияларға жауапты қызметкерлерді жасырын түрде қабылдауға кіріскен.
Жарияланған ақпаратқа сәйкес, топтың негізгі мақсаты – Кубаның саяси элитасы ішінде алауыздық туғызып, Гавана билігіне қысым жасау арқылы елдегі саяси өзгерістерге ықпал ету. Атап айтқанда, АҚШ-қа қарсы қатаң ұстанымдағы басшыларды неғұрлым прагматикалық саясаткерлермен алмастыру көзделгені айтылған.
The New York Times қазіргі бастаманы 1960 жылы құрылған және кейін Шошқалар шығанағы операциясына дайындық жүргізген ЦРУ құрылымымен салыстырады. Сонымен бірге қазіргі топтың өкілеттігі әлдеқайда шектеулі екені және оған әзірге адам өліміне әкелуі мүмкін операцияларды жүргізуге рұқсат берілмегені атап өтілген.
Басылымның жазуынша, АҚШ Кубаға қатысты барлау ақпаратын жинау басымдығын «бірінші деңгейге» дейін көтерген. Бұл санатқа Қытай, Иран және Ресей де енгізілген. Авторлар мұны Вашингтонның Кубаға қатысты ықтимал қосымша қысым шараларына немесе өзге сценарийлерге дайындық белгісі ретінде бағалайды.
Материалда сондай-ақ ЦРУ директоры Джон Рэтклиффтің жуырда Кубаға барғаны және сапар барысында Венесуэла президенті Николас Мадуроге қатысты бұрынғы арнайы операцияға қатысқан тұлғаны бірге алып барғаны айтылған. Басылым мұны Гаванаға жасалған саяси белгі ретінде сипаттайды.
Өз кезегінде ЦРУ The New York Times басылымына бұл ақпаратқа қатысты түсініктеме беруден бас тартқан.
Ал Куба билігі мұндай мәліметтердің өздері үшін күтпеген жаңалық еместігін айтып, Вашингтонды арал мемлекетінің ішкі істеріне ұзақ жылдар бойы араласуға әрекет жасап келеді деп айыптады.
Айта кетейік, жарияланған ақпарат The New York Times дереккөздеріне негізделген. АҚШ билігі аталған мәліметтерді ресми түрде растаған жоқ.