Munarmedia.kz 08.07.2026. ASTANA – Ресейдегі мұнай өңдеу зауыттарына жасалған ұшқышсыз ұшу аппараттарының шабуылдарынан кейін ел ішінде жанармай тапшылығы күшейіп, Мәскеу ішкі нарықты тұрақтандыру мақсатында мұнай өнімдерінің экспортын шектеді. Бұл жағдай ресейлік энергия ресурстарына тәуелді Орталық Азия мемлекеттерінің нарығына да ықпал етіп отыр.
Сарапшылардың пікірінше, өңір елдерінің басым бөлігі жанармай импорты бойынша Ресейге тәуелді болғандықтан, экспорт көлемінің қысқаруы жанармай жеткізу тізбегіне әсер етіп, бағаның өсуіне және тапшылық қаупінің артуына себеп болуы мүмкін.
Қырғызстанда жоғары октанды жанармай тапшылығы байқалып, бірқатар жанармай құю станциялары отын жеткізу бойынша қиындықтарға тап болған. Ел билігі ішкі нарықтағы бағаға бақылауды күшейткен.
Тәжікстанда ресми органдар жанармай тапшылығы жоқ екенін мәлімдегенімен, нарықта отын бағасының өсуі тіркеліп отыр. Сонымен қатар билік жанармай импортын әртараптандыру мақсатында Ираннан жеткізу мүмкіндігін қарастыруда.
Өзбекстанда авиациялық керосин тапшылығына байланысты Ресей бағыты бойынша кейбір әуе рейстерінің саны қысқартылғаны хабарланды.
Ал Қазақстанда жанармай қоры шамамен бір айға жететіні айтылуда. Сонымен бірге ықтимал тәуекелдердің алдын алу мақсатында Қытайдан мұнай өнімдерін импорттау мүмкіндігі қарастырылып жатыр.
Сарапшылардың бағалауынша, Ресейдегі мұнай өңдеу инфрақұрылымына жасалған шабуылдар мен экспорттық шектеулер өңірдің энергетикалық қауіпсіздігіне қосымша қысым түсіріп, Орталық Азия елдерін жанармай жеткізу бағыттарын әртараптандыруға итермелеуі мүмкін.
#MunarMedia #Қазақстан #Ресей #ОрталықАзия #Энергетика #Жанармай #Қырғызстан #Тәжікстан #Өзбекстан #Қытай