2025 жылдың бірінші тоқсанында Жоғары аудиторлық палата (ЖАП) бақылауды күшейту бағытын жалғастырды. Ведомствоның хабарлауынша, осы кезеңде 24 нысанда төрт аудиттік іс-шара жүргізіліп, 5,9 трлн теңге көлеміндегі қаражат қамтылған. Анықталған заңбұзушылықтар 355 млрд теңгені құрады. Оның ішінде:
– қаржылық заңбұзушылықтар – 3,3 млрд теңге,
– мемлекеттік қаражат пен ресурстарды тиімсіз пайдалану – 287,6 млрд теңге,
– жоспарлау кемшіліктері – 64,6 млрд теңге.
Берілген ақпаратқа сәйкес, 3,3 млрд теңге қалпына келтірілуі тиіс сомалар ретінде белгіленген, оның 1 млрд теңгесі бюджетке қайтарылып үлгерді.
ЖАП мәліметінше, Үкіметке 32 ұсыныс, ал тексерілген нысандарға 159 тапсырма жолданған. Бұл тапсырмалардың орындалуы ЖАП тарапынан толық аяқталғанға дейін бақылауда болады.
Жалпы, 2025 жылы 30-ға жуық аудиттік іс-шараны аяқтау жоспарланып отыр. Жоғары аудиторлық палата мемлекеттік аудит саласында стратегиялық әрі тәуекелге бағытталған тәсілді күшейту жұмысын жалғастырып келеді.
«2024 жылдың қорытындылары көрсеткендей, сапалы бақылау — бұл тек қана міндетті қадағалау емес, бюджет қаражатын қайтарудың, заңбұзушылықтардың алдын алудың және қоғамның мемлекеттік органдарға деген сенімін арттырудың нақты тетігі болып табылады», – деп қосты ЖАП.