Munarmedia.kz 11.11.2025 /Астана/ Halyk Finance: теңге біртіндеп әлсірейді
Halyk Finance сарапшыларының жаңа есебіне сәйкес, 2026 жылы доллар бағамы 600–610 теңге аралығында болуы ықтимал.
Мамандардың айтуынша, бұл – импорт көлемінің өсуі мен Ұлттық қордан шетел валютасын сатудың қысқаруынан туындайтын теңге әлсіреуінің жалғасы.
2025 жылдың соңына қарай доллар шамамен 550–560 теңге деңгейінде тұрақтайды деген болжам бар. Бұл — теңге бағамының біртіндеп әлсіреу кезеңіне өтіп жатқанын көрсетеді.
Нарықты ұстап тұрған мұнай мен алтын
Halyk Finance талдаушыларының пікірінше, жыл соңына дейін мұнай бағасы қазіргі деңгейін сақтайды, ал мұнай экспортының көлемі өсе түседі.
Сонымен қатар, алтынмен айналым операцияларын айна түрінде «стерилизациялау» шаралары күшейтілмек. 2025 жылдың төртінші тоқсанында осы мақсатта 1,4 триллион теңге (яғни ай сайын 848 млн доллар) көлемінде шетел валютасы сатылады.
Бұл шаралар Ұлттық қордан валюта сатылымының азаюын өтеп, нарықтағы шетел валютасының ұсынысын арттырып, теңге бағамына қысымды уақытша жұмсартпақ.
2026 жылы 600 теңгеден жоғары доллар – негізгі сценарий
Сарапшылар 2026 жылы теңге бағамының 600–610 теңгеге дейін төмендеуін ең ықтимал сценарий деп санайды.
«Бұл үрдіске әлемдік мұнай бағасының төмендеуі, экспорттық табыстың азаюы және Ұлттық қордан валюталық түсімнің қысқаруы әсер етеді. Осы факторлар ішкі нарықтағы сұраныс пен ұсыныс арасындағы теңгерімсіздікті арттырады», – делінген Halyk Finance шолуында.
Экономика өссе де, табыс азайып барады
Талдау қорытындысында 2025 жылдың үшінші тоқсанында Қазақстан экономикасының өсу қарқыны жоғары болғанымен, баяулай бастағаны атап өтілді.
Жыл басынан бергі 9 айда ЖІӨ өсімі – 6,3%, бұл қаңтар–тамыз аралығындағы 6,5% көрсеткішінен төмен. Сарапшылар мұны негізгі салалардың барлығында өндіріс қарқынының азаюымен байланыстырады.
Негізгі өсім көзі әлі де Теңіз кен орнындағы мұнай өндірудің кеңеюі болып отыр. Ал қысқа мерзімді экономикалық серпін берген факторлар — инфрақұрылымдық шығындар мен Ұлттық қордан бөлінген ауқымды трансферттер — өз әсерін азайта бастаған.
Нақты табыс пен экономикалық теңгерім
Экономика өсіп жатқанымен, халықтың нақты табысы төмендеу динамикасында. Бұл – инфляцияның жоғары деңгейі мен бағаның өсуі аясында тұрғындардың өмір сүру сапасының нашарлап бара жатқанын көрсетеді.
Сарапшылардың пікірінше, алдағы жылы теңгенің әлсіреуі мен мұнай нарығындағы белгісіздік жағдайында табыс пен баға арасындағы айырмашылық одан әрі ұлғаюы мүмкін.