📍 Орталық Азия, 15 сәуір 2025 ж. – Munarmedia.kz.
АҚШ-тың Орталық барлау басқармасы (ЦРУ) жақында жариялаған құжаттарында Адольф Гитлерді соғыстан кейінгі он жыл бойы іздегені жайлы деректер анықталды.
Ресми түрде 1945 жылы Гитлердің өлгені расталғанымен, америкалық арнайы қызмет өкілдері оны Оңтүстік Америкада тірі жүр деп есептеп, ұзақ уақыт бойы іздеген. Соғыстан кейін Гитлер үшін Аргентинада оның жақтастарына тиесілі қонақүйде арнайы паналау орны дайындалғаны айтылған.
1955 жылы ЦРУ-дың бір агенті Колумбиядағы жағажайда түсірілген суретті алған. Онда Гитлер "Адольф Шриттельмайор" деген жалған есіммен бейнеленген болуы мүмкін деген болжам жасалған. Алайда кейінірек бұл операция тоқтатылды – себеп ретінде оны дәлелдеу мүмкіндігінің төмендігі айтылды.
Бұл – америкалық арнайы қызметтердің мұндай тақырыптағы алғашқы деректері емес. 2019 жылы ФБР Гитлерді Аргентинаға жеткізуге көмектескен деген анонимді дереккөз туралы құжаттарды жариялаған болатын. Сол дереккөздің айтуынша, Гитлер мен оның серіктері Берлин құлағаннан кейін шамамен 17 күн өткен соң Аргентинаға екі сүңгуір қайықпен келген. Онымен бірге екі әйел, дәрігер және бірнеше ер адам болған.
Олар Анд тауларына жақын маңда орналасқан жеке үйге қоныстанған. Гитлер бұл кезде демікпе мен асқазан жарасымен ауырған, әйгілі мұртын да сыпырып тастаған екен.
Еске сала кетейік, 1945 жылдың сәуір айының соңында Кеңес әскерлері Берлинді толық қоршауға алған еді. Сол кезде Гитлер биліктен толықтай бас тартып, 29 сәуірде Ева Браунмен некелесіп, келесі күні өзін атып өлтірген. Бұл оқиғаның куәгерлері – оның адъютанты Отто Гюнше мен хатшысы Траудль Юнге. Гитлер мен Браунның денелері рейхсканцелярия ауласында өртенген.
Кейінірек Кеңес жауынгерлері бункерден табылған қалдықтарды НКВД штабына жеткізді. Негізгі айғақ ретінде оқ іздері бар бас сүйек, сүйек қалдықтары және тіс протездері тіркелген.
📷 Фото: Ашық дереккөздер