Munarmedia.kz.9.07.2025 жыл /Астана/-Қазақстан Республикасының Экология министрлігі Астана сотының North Caspian Operating Company (NCOC) консорциумына қатысты 2,3 трлн теңге (шамамен $4,2 млрд) көлеміндегі айыппұлды жою жөніндегі шешіміне кассациялық шағым түсіруді жоспарлап отыр. Аталған консорциум — еліміздегі ең ірі мұнай-газ кен орны — Қашағанның операторы.
Сот айыппұлды жоюға негіз ретінде министрліктің ұйғарымын рәсімдеу кезінде орын алған рәсімдік кемшіліктерді атап өткен. Дегенмен, экологиялық талап-арыздардың мәні мен негізділігі сотта қарастырылған жоқ.
Экология департаментінің Атырау облысы бойынша басқармасы анықталған кемшіліктерді жоюға кірісіп, кассациялық шағымды дайындауда, деп хабарлайды Курсив.
Бұған дейін NCOC экологиялық нормаларды бұзды деп айыпталған еді. Негізгі шағымдар — күкірт сақтау лимиттерінен асып кету және шаң басу жүйесінің болмауы.
Қашаған жобасының акционерлері қатарында «ҚазМұнайГаз» (KMG), Shell, Total, Eni, ExxonMobil, CNPC және Inpex бар. Кен орнын игеруге салынған жалпы инвестиция көлемі $60 млрд-тан асады.