Munarmedia.kz 23.11.2025 / Астана/ Үкіметтің инфляцияны тұрақтандыру мәселелеріне арналған кеңесінде әлеуметтік маңызы бар азық-түлік тізімін кеңейту мүмкіндігі талқыланды. Сауда және интеграция бірінші вице-министрі Айжан Бижанованың айтуынша, қазіргі таңда тізімге кірмесе де, дәл осы өнімдер бағаның өсуіне ең үлкен ықпал етіп отыр.
Ұсынылып отырған тізімге түрлі ет түрлері, жаңа ауланған балық, алма, алмұрт, лимон, банан, сондай-ақ шай, сыр, қияр мен қызанақ кіреді. Бұл позициялар бизнес қауымдастығымен қосымша талқыланбақ.
Егер тізім кеңейетін болса, кәсіпкерлер әлеуметтік маңызы бар тауарларға қойылатын міндетті талаптарды орындайды:
— фискалдық чектерді міндетті түрде беру,
— шарттарды дұрыс рәсімдеу,
— сауда үстемесін 15%-дан асырмау.
Қазіргі таңда әлеуметтік маңызы бар тауарлар тізімінде 19 атау бар. Оған нан, жарма, сүт өнімдері, кейбір көкөністер мен ет түрлері кіреді. Үкімет түпкілікті шешімді барлық талқылаулардан кейін қабылдайды.