2024 жылғы желтоқсанға дейінгі жағдай бойынша Қазақстан экономикасына берілген несиелер жыл басынан бері 22,3%-ға артып, 40,9 триллион теңгені құрады, деп хабарлайды Ұлттық банк. Несие портфелінің негізгі бөлігін (85,8%) банк секторына берілген несиелер құрайды, олардың көлемі 35 триллион теңгеден асты.
Халыққа берілген несиелер жалпы көлемнің 54%-ын (22,1 триллион теңге) құрап, жыл ішінде 23,7%-ға артты. Бизнеске берілген несиелер 20,6%-ға өсіп, 18,8 триллион теңгені құрады.
Ұлттық валютада берілген несиелер көлемі 18,9%-ға артып, 36,8 триллион теңгені, шетел валютасында берілген несиелер 64%-ға өсіп, 4,1 триллион теңгені құрады, бұл валюта бағамының өзгеруімен байланысты. Алайда, соңғы айда халыққа берілген шетел валютасындағы несиелер 3,6%-ға азайып, 2,57 миллиард теңгені құрады (zakonkz).