Қазақстандағы халықтың жалпы несиесі 18 трлн теңгеге жетті

Агенттіктің ақпараты 2024 жылдың 1 маусымындағы жағдай бойынша Қазақстанның банк секторында 21 екінші деңгейдегі банк бар. Оның 11-і шетелдің қатысуымен, 8-і еншілес банк. Банк секторының активтері негізінен өтімді активтердің 3%-ға немесе 598 млрд теңгеге өсуі есебінен мамырда 1,6%-ға немесе 853 млрд теңгеге ұлғайып (2024 жылдың басынан бері 3,5%-ға немесе 1,8 трлн теңгеге өсу), 53,3 трлн теңгені құраған. – Екінші деңгейдегі банктердің өтімділігі жоғары активтері 15,8 трлн теңгені немесе активтердің 29,6%-ын құрады, бұл банктерге міндеттемелеріне толық көлемде қызмет көрсетуге мүмкіндік береді. 2024 жылдың мамырында екінші деңгейдегі банктер экономикаға берген кредиттер 1,4%-ға 29,5 трлн теңгеге дейін (2024 жылдың басынан бері 5,6%-ға өсу), оның ішінде ұлттық валютада 1,4%-ға 27,2 трлн теңгеге дейін, шетел валютасында 1,8%-ға 2,4 трлн теңгеге дейін ұлғайды. Нәтижесінде теңгедегі кредиттердің үлес салмағы 2024 жылғы 1 маусымдағы жағдай бойынша 92,0%-ды құрады, – делінген хабарламада. Бизнеске берілген несие Бизнес субъектілеріне берілетін кредиттер 2024 жылғы мамырда 1,5%-ға 11,5 трлн теңгеге дейін ұлғайды (2024 жылдың басынан бері 2,5%-ға өсу). Олардың құрылымында заңды тұлғаларға берілетін кредиттер 0,9%-ға 9,7 трлн теңгеге дейін өсті (2024 жылдың басынан бері 0,1%-ға төмендеу). Оның ішінде ШОБ субъектілеріне қарыздар 0,1%-ға 5,6 трлн теңгеге дейін, ірі бизнеске қарыздар 1,9%-ға 4,1 трлн теңгеге дейін ұлғайды. Дара кәсіпкерлерге берілетін кредиттер бір айда 5,3%-ға 1,9 трлн теңгеге дейін ұлғайған. 2024 жылғы мамырда бизнес субъектілеріне 1,4 трлн теңге сомасына жаңа қарыздар берілді, бұл 2023 жылғы мамырмен салыстырғанда 10,6%-ға артық (2024 жылдың басынан бері 6,8 трлн теңге берілді, бұл 2023 жылдың тиісті кезеңімен салыстырғанда 21,8%-ға артық). Халыққа берілген несие Халыққа берілген кредиттер 2024 жылғы мамырда 1,3%-ға ұлғайып, 18,0 трлн теңгені құрады (2024 жылдың басынан бері 7,8%-ға өсу). Халыққа берілген кредиттердің өсуі тұтынушылық қарыздардың 1,7%-ға 11,3 трлн теңгеге дейін ұлғаюына, сондай-ақ ипотекалық кредиттеудің 0,5%-ға 5,5 трлн теңгеге дейін өсуіне байланысты. Уақтылы жабылмай жатқан несиелер 1 маусымдағы жағдай бойынша банк секторында мерзімі өткен берешегі 90 күннен асатын қарыздар деңгейі (NPL 90+) несие портфелінің 3,2%-ын немесе 1,0 трлн теңгені құрады (2024 жылғы 1 қаңтардағы жағдай бойынша – 2,9% немесе 864 млрд теңге). Бизнеске берілген қарыздар бойынша NPL90+ деңгейі 2,2%-ды немесе 283 млрд теңгені, халыққа берілген кредиттер бойынша – 4,0%-ды немесе 716 млрд теңгені құрады. Жұмыс істемейтін қарыздарды провизиялармен өтеу жоғары деңгейде сақталып, 72,3%-ды құрайды (01.01.2024ж. – 75,9%).