1 миллион пара бермек болған имам жұмыстан шығарылды

1 миллион теңге көлемінде пара бермек болған имам Талғат Нұрман «Ыбырай молда» мешітінен жұмыстан шығарылды, деп хабарлайды Nege.Aqsha.

«Ыбырай молда мешітінің имамы Нұрман Талғат Нұрманұлы ҚМДБ-ның қаулысымен соттың сыбайлас жемқорлық қылмысын жасағаны үшін кінәлі деп танылып, оңалтуға жатпайтын негіздер бойынша қылмыстық жауапкершіліктен босатылуына байланысты қызметінен босатылды. Нұрманның ҚМДБ жүйесінен босатылғаннан кейінгі жұмыс орны мен қызметі туралы бізде мәлімет жоқ», - деп хабарлады Қазақстан мұсылмандары діни басқармасы «Nege.Aqsha» сайтының сауалынан кейін.

Тамыз айында мешіттің бұрынғы имамы Талғат Нұрман мен сыбайлас жемқорлыққа қарсы іс-қимыл агенттігінің қызметкері Серік Әбілқайыров жемқорлық үшін сотталған болатын. Нұрман имам «деструктивті діни ағымдарды жақтаушылардан ақша алады және екі әйел асырап отыр» деген күдіктен кейін тексеруден құтылу үшін сыбайлас жемқорлыққа қарсы іс-қимыл органының қызметкеріне 1 миллион теңге береді.

Алайда ақша берген соң имамның өзі құқық қорғау органдарына хабарласып, іс қозғалған. Сот Нұрманды пара беруге әрекеттенгені үшін кінәлі деп таныды, бірақ оны қылмыстық жауапкершіліктен босатты. Жазда үкім шығарылды.

Сондай-ақ мүфтият бұрынғы имамның әйелдерінің саны мен оның деструктивті ағымдармен байланысы туралы ақпаратты растамады, және қызметкерлерінің жеке өміріне араласпайтынын айтқан