Munarmedia.kz.9.07.2025 жыл /Астана/-Алматы облысының Үлкен ауылында ел тарихындағы алғашқы атом электр станциясының (АЭС) құрылыс жобасы ресми түрде іске қосылды. Бұл ауқымды бастама инженерлік-геологиялық ізденістерден басталып отыр — мамандар болашақ нысанның ең тиімді орналасу алаңын таңдау және жобалық құжаттаманы дайындау үшін зерттеу жұмыстарын жүргізуде.
АЭС салу бастамасы Қазақстан үшін стратегиялық маңызы бар жобалардың бірі ретінде қарастырылады. 8 тамызда өткен ресми іс-шараға Ресейдің «Росатом» мемлекеттік корпорациясының бас директоры Алексей Лихачев және Қазақстан Республикасының Атом энергетикасы агенттігінің төрағасы Алмасадам Сәтқалиев қатысты, деп хабарлайды Exclusive.kz.
«Росатом» инжинирингтік дивизионының мамандары алғашқы барлау ұңғымасын бұрғылауға және топырақ үлгілерін алуға кірісті. Бұл зерттеулер сейсмикалық тұрақтылықты, гидрогеологиялық ерекшеліктерді және жер бедерінің өзге де маңызды параметрлерін бағалауға мүмкіндік береді. Ізденіс кезеңінде тереңдігі 30-дан 120 метрге дейінгі кемінде 50 ұңғыма бұрғыланбақ.
Салтанатты шара аясында Үлкен ауылы тұрғындарына Түркиядағы «Аккую» АЭС, Беларусь АЭС, Венгриядағы «Пакш-2» АЭС және Бангладештегі «Руппур» АЭС өкілдері бейнеүндеу жолдады. Бұл елдерде ВВЭР-1200 типіндегі реакторлармен жабдықталған энергоблоктар жұмыс істеп тұр немесе салынып жатыр. Қатысушылар атом энергетикасының әлеуметтік-экономикалық өсудегі рөлін атап өтіп, қазақстандық жобаға қолдау білдірді.
Болашақ қазақстандық АЭС-тің негізі — III+ буынға жататын заманауи ВВЭР-1200 (су-су энергетикалық реакторы, электр қуаты 1200 МВт) реакторлары. Мұндай технология Ресей, Беларусь, Түркия, Бангладеш, Мысыр және Қытайдағы жұмыс істеп тұрған әрі салынып жатқан нысандарда қолданылып келеді. Реактордың қызмет ету мерзімі — 60 жыл, оны қосымша 20 жылға ұзарту мүмкіндігі бар.