Munarmedia.kz 10.07.2025 /Астана/-Алматы – Республикалық ғылыми педиатрия және балалар хирургиясы орталығының кардиохирургтары 5 жасар науқасқа сирек әрі аса күрделі жүрек операциясын – Фонтен әдісін сәтті орындады. Бұл туралы ҚР Денсаулық сақтау министрлігінің баспасөз қызметі хабарлады.
Науқас туғаннан бері ауыр туа біткен ақаумен өмір сүріп келеді: жалғыз қарынша, магистральді тамырлардың транспозициясы және өкпе артериясының атрезиясы. Мұндай жағдайда қалыпты екіқарыншалық қанайналымды қалыптастыру мүмкін болмайды. Сондықтан емдеу бірқарыншалық қанайналым жүйесін кезең-кезеңімен құру арқылы жүргізіледі.
Қыз балаға алғашқы диагноз Қызылорда облыстық балалар ауруханасында қойылған. Кейін ол санитарлық авиация арқылы Алматыдағы ғылыми орталыққа жеткізілді.
-
2021 жылғы ақпан – бірінші кезең: Глен бойынша кавопульмональды анастомоз.
-
2025 жылғы шілденің соңы – екінші, соңғы кезең: экстракардиальды Фонтен фенестрациямен, параллель жасанды қанайналым жағдайында.
Хирургиялық араласу 6,5 сағатқа созылды. Операцияны жоғары санатты кардиохирургтар, анестезиологтар және перфузиологтар бірлесе жүргізді.
Нәтижесінде баланың жүрек қызметі тұрақтанып, қанайналымның тиімділігі артты. Қазіргі уақытта оның жағдайы қанағаттанарлық, операциядан кейінгі кезең асқынусыз өтіп жатыр.
Мамандардың айтуынша, мұндай күрделі операциялардың ел ішінде сәтті орындалуы – қазақстандық медицинаның даму деңгейінің айқын дәлелі. Бұрын мұндай науқастарды емдеу үшін шетелге жіберу қажет болса, қазір бұл тәжірибе өз елімізде қолжетімді болып отыр.
5 жасар қызға жасалған Фонтен операциясы – тек бір отбасының ғана емес, отандық медицинаның да жеңісі. Бұл оқиға Қазақстанда жоғары технологиялық балалар кардиохирургиясының мүмкіндіктері артып келе жатқанын айқын көрсетті.