Munarmedia.kz 05.07.2026. ASTANA – Алматы қаласының соты бұрынғы Президент Нұрсұлтан Назарбаевтың қызы Динара Құлыбаеваға тиесілі болған жер учаскесіне қатысты құжаттардың күшін жою туралы шешім шығарды.
Әңгіме Алматының тау бөктеріндегі ауданында орналасқан Әлмерек көшесінің бір бөлігіне қатысты болып отыр. Сот материалдарына сәйкес, аталған көше бөлігі жеке меншік аумақтың құрамына еніп, қоршаумен қоршалған.
Іс материалдарына сәйкес, 6,2570 гектар аумақты қамтитын, тұрғын үйге қызмет көрсетуге арналған жер учаскесі 2007 жылы айырбас шарты негізінде Динара Құлыбаеваның меншігіне өткен. Ол кезде жер учаскесі Қарасай ауданының аумағында орналасқан болса, кейін Алматы қаласының әкімшілік шекарасына енгізілген.
2014 жылы Динара Құлыбаева жер учаскесіне жаңа сәйкестендіру құжаттарын рәсімдеу үшін «Жер ғылыми-өндірістік орталығы» РМК-ның Алматы қалалық филиалына жүгінген.
Алайда кадастрлық істі зерделеу барысында 2014 жылы берілген сәйкестендіру құжаты мен өткен жылы рәсімделген кадастрлық паспорттың жер учаскесінің конфигурациясы заңсыз өзгертіліп дайындалғаны анықталған. Сонымен қатар іс материалдарында жерге орналастыру жобаларының болмағаны көрсетілген.
Осы мән-жайларды негізге алған сот аталған жер учаскесіне қатысты рәсімделген құжаттардың күшін жою туралы шешім қабылдады. Сот шешімінің заңды күшіне енуі және оған шағымдану мүмкіндігі туралы ақпарат жарияланған жоқ.
#Алматы #ДинараҚұлыбаева #Әлмерек #ЖерДауы #Сот #ЖерУчаскесі #Қазақстан #Munarmedia