Арменияның Экономика министрі елдің Еуразиялық экономикалық одақтан (ЕАЭО) шығу мәселесі Үкіметтің күн тәртібінде жоқ екенін мәлімдеді.
– Қазіргі уақытта Армения ЕАЭО мүшесі болып табылады, және одақтан шығу мәселесі Үкіметтің күн тәртібінде тұрған жоқ, – деп мәлімдеді Экономика министрі Геворк Папоян баспасөз конференциясында.
Министр Еуропалық Одаққа мүшелік мәселесінің «параллельді» екенін атап өтті.
Бұған дейін Армения үкіметі елдің Еуропалық Одаққа қосылу туралы заң жобасын мақұлдаған болатын. Бұл заңды қабылдау қосылу процесінің бастамасы болмақ. Сонымен бірге, Премьер-Министр Никол Пашинян атап өткендей, соңғы шешім бүкілхалықтық референдум арқылы қабылданады.
Ресей Федерациясы Премьер-Министрінің орынбасары Алексей Оверчук Арменияда Еуропалық Одаққа қосылу туралы заң жобасын талқылау ЕАЭО-дан шығу процесінің бастамасы ретінде қарастырылатынын мәлімдеген болатын.